Noticies curties

Fuxida, grupu d'orixe asturxaponés afincáu en New York, actúa esti xueves n'Uviéu en formatu dúu. Va ser a les 21.30 hores en L'Esperteyu.

El gaiteru y saxofonista uviedín Carlos Casado y el cantante y guitarrista xaponés Tatsuo Teraoka lideren Fuxida, banda conformada por cinco músicos orixinarios d'Asturies, Xapón y Catalunya que da como resultáu un amiestu orixinal y rompedor de folk, jazz, pop, rock y ritmos llatinos. Ente'l so repertoriu tán cantares tradicionales asturianos como 'Chalaneru', 'Carcarosa' o 'Santa Bárbara Bendita'.

L'UC Ceares nun va adaptar el so nome pa recoyer la toponimia tradicional del barriu. Ganó la opción 'Ceares' con un 51,74 por cientu de los votos, una diferencia de 6 papeletes.

Estos díes ta celebrándose en Lisboa’l X Festival Internacional Máscara Ibérica (FIMI). Un añu más, Los Sidros y La Comedia de Valdesoto son protagonistes nesti eventu multitudinariu.

La conseyera Ana González esplicó'l martes los conteníos de los decretos de currículu pa Secundaria y Bachilleratu. La Llingua Asturiana da un pasu atrás na etapa última.

La LVIII Vuelta a Asturies foi pal vascu Igor Antón (Movistar). La ronda ciclista recuperóse con dos etapes tres el parón del añu pasáu y finó con trunfu na cabera del so compañeru Herrada.

L'autopista del mar, los fondos mineros o la situación de la llingua tratáronse nel aconceyamientu de la coalición Los Pueblos Deciden. Nella participa Andecha Astur.

Un total de diecinueve formaciones presentaron la so candidatura a les eleiciones a la Xunta Xeneral del 24 de mayu. Andecha Astur, Foro y URAS, les úniques que nun son de calter estatal.

La Coordinadora Ecoloxista d'Asturies denunció esti vienres un arramáu nel ríu Nalón. Apreciaron esplumes "de supuesta procedencia industrial" nun tramu significativu cerca de Trubia.

La reforma parcial de la Llei del Albuertu pasó'l primer trámite parllamentariu nel Congresu. El PP contó col sofitu de Foro, UPN y los cinco diputaos d'Unió Democràtica de Catalunya.

El diputáu d'UPyD Ignacio Prendes foi espulsáu del partíu, polo que tomó la decisión d'abandonar el so escañu. El xixonés trabaya nuna plataforma pa llegar a alcuerdos con Ciudadanos.

Rosa Díez nun almitió les crítiques recibíes n'Asturies y decidió disolver la direición d'UPyD nel país y imponer una xestora. Ignacio Prendes podría nun ser el candidatu nes Nacionales.

Pasu atrás nel procesu d'oficialización de la toponimia tradicional. Bual recupera un añu depués el términu castellanizáu y pasa a denominase de manera billingüe: 'Boal/Bual'.

El 24 de mayu va haber eleiciones a la Xunta Xeneral, pa les que tienen derechu a votu un total de 988.038 asturianos y asturianes. D'ellos, 106.541 residen fuera del Estáu.

L'aumentu de la emigración por mor de la situación que vive'l país fai qu'esta cifra medrara en 22.316 persones con respeuto a la cita de 2011 y en 16.721cola del 2012, según los datos qu'ufrió güei Guillermo Martínez, conseyeru de Presidencia. Arxentina continúa siendo'l país con más asturianos rexistaos nel Censu Eleutoral de Residentes Ausentes (28.598), siguíu por México (17.125) y Cuba (12.867).

Los ganadores del concursu al traviés del Twitter 'Cola poesía na llingua' foron Iván Rendo y Águeda Díaz Tuero. Iniciativa pol Asturianu entregó'l miércoles los gallardones en Xixón.