El grupu l.lenizu Spanta la Xente presenta esti sábadu en La Pilastra 'Revolucionando'

El grupu l.lenizu Spanta la Xente presenta esti sábadu, día 25 a les 23,00 hores, nel patiu del colexu La Pilastra'l tercer discu de la formación: 'Revolucionando'. Al pie de ellos, nel escenariu tamién va tar Imanol Núñez de TrueQuedart, Miguel Herrero, Carlos García y la Banda de Gaites 'Güestia', ente otres collaboraciones.

Antes del conciertu de presentación del nuevu trabayu del grupu l.lenizu van actuar, a partir de les 22,00 hores, Chus Pedro y Gabino Antuña.

Les puertes del colexu van abrir a les 21,00 hores. La entrada pa esti conciertu, que va realizáse con un gran esplegue audiovisual y nun gran escenariu, ye gratuita.

'Revolucionando' ye'l tercer trabayu d'esti grupu formáu por Tinto (voz), Rubén (guitarres), Xulio (teclaos y coros), Saúl (gaita y xiblates), Natalia (violín), Torre (baxu), Juanín (batería) y Rami (guitarres). L'anterior discu d'esta formación 'Alienda' presentóse en 2011.