Suárez del Fueyo, candidatu a l'alcaldía de Xixón Sí Puede

La candidatura de xunidá popular Xixón Sí Puede celebró'l sábadu les primaries con trunfu pa Mario Suárez del Fueyo. El direutor del CP Xovellanos ye'l secretariu xeneral de Podemos Xixón.

1.280 persones participaron na votación celebrada de manera presencial en dellos centros municipales y llocales de la ciudá al traviés d'un sistema nel que caún debía decidir 12 candidatos nun orde ente los 44 que se presentaren. Finalmente, el vencedor foi Suárez del Fueyo al recibir 462 puntos, casi'l doble que Nuria Rodríguez López (263), la segunda de la llista. Tres ellos apaecen Estefanía Puente (224), David Alonso Medina (175), J. Orlando Fernández Casanueva (139), Alejandro Zapico (139), Verónica Rodríguez Fernández (115), Roberto González Zapico (110), Sara Odriosolo (99) y Lorena Montes (95).

Pa la conformación de la llista eleutoral síguise un sistema de cremallera pol que, conforme a los resultaos de les primaries, altérnase un candidatu y una candidata hasta completar 27 integrantes y trés suplentes. Ye la siguiente: Mario Suárez del Fueyo, Nuria Rodríguez López, David Alonso Medina, Estefanía Puente, J. Orlando Fernández Casanueva, Verónica Rodríguez Fernández, Alejandro Zapico, Sara Odriosolo, Roberto González Zapico, Lorena Montes, Daniel Fernández Blanco, María Argentina Pereira, Santiago Obaya, Merced Mediavilla, Omar Tuero, Alejandra Lobo, Santiago Tiscar, Delfina López Rodríguez, Antón Caamaño, Marisa Martínez González, Héctor Gómez Navarro, Cristina Entrialgo, Franciso A. Estévez González, Cristina Obeso, José María Amigó, Inés Prada y Pablo Antón Marín Estrada. Como suplentes van, nesti orde, María José Rodríguez de la Cera, Guillermo Díaz Martínez y Nuria Saavedra.

Xixón Sí Puede trátase d'una candidatura de xunidá popular que cuenta col sofitu de Podemos y Equo, amás de dellos coleutivos y independientes. "L'ésitu eleutoral comprométenos cola ciudadanía a conquistar l'Ayuntamientu pa puxar por un modelo de ciudá y una forma de facer política diferente", declaró'l secretariu xeneral de Podemos Xixón y vencedor de les primaries tres conocer los resultaos definitivos.