Un bloque soberanista va participar na manifestación del 1 de mayu de CSI, CGT y SUATEA

La iniciativa #LluchandoPolaSoberanía va participar esti vienres, 1 de mayu, na manifestación de Xixón convocada por CSI, CGT y SUATEA. Va salir a les 12.30 hores de L'Humedal.

D'esta forma, repítese la fórmula emplegada l'añu pasáu con ésitu en delles convocatories como'l propiu Día Internacional de los Trabayadores o'l Día de la Nación Asturiana, ente otres. Les persones que lu convoquen pa mañana, por iniciativa de La Llegra, faen un llamáu a participar nél al entender que'l "camín pa la clase obrera asturiana va venceyáu a la llucha pola soberanía pal nuesu pueblu, pa poder decidilo too, pa conquistar un futuru dignu de toes y pa toes". Compromisu por Asturies, Conceyu Abiertu, Darréu o Xunta Estudiantil Asturiana yá anunciaron el so sofitu a esta convocatoria.

La manifestación entamada por CSI, CGT y SUATEA lleva'l lema 'Escontra'l paru y la precariedá. Escontra la corrupción y la represión nun hai 'mordaza' que valga' y va salir a les 12.30 hores de L'Humedal. Media hora enantes, dende la plaza de toros d'El Bibio, va partir la convocada por CC OO y UXT col mensaxe 'Las personas son lo primero'. La CNT, mentes, va celebrar una manifestación al meudía con salida d'El Parche (Avilés), pa depués facer una xinta na casa sindical de Candás y una ufrienda floral (18 hores) nel prau del faru de la villa.

Completa les actividaes reivindicatives pol 1 de mayu una folixa solidaria entamada por Par@os y Precari@es d'Asturies col sofitu de ¡Asturies en pie! nel Muséu del Pueblu d'Asturies. Ésta va principiar a les 14.30 hores y va haber talleres, xuegos pa neños y neñes, música y puestos de cooperatives llaborales. Los conciertos, protagonizaos por Ismael Tomás y El Finu, El Koku la Manzana y la Orquesta Naval de los Nervios, van principiar a les 18 hores. Tolos ingresos que se xeneren nel chigre de la fiesta van dir destinaos a apoyar a les persones encausaes pola so participación en lluches obreres y sociales.