Los Sidros y La Comedia animen el X FIMI de Lisboa

Estos díes ta celebrándose en Lisboa’l X Festival Internacional Máscara Ibérica (FIMI). Un añu más, Los Sidros y La Comedia de Valdesoto son protagonistes nesti eventu multitudinariu.

Con miles de visitantes mientres los cuatro díes que dura’l festival de la capital portuguesa –de xueves a domingu–, esti certame ye un escaparate importantísimu p’Asturies y la so cultural. Asina, Siero y Xixón van tar presentes un añu más con un stand na praça do Rossio, onde tamién va instalase un chigre asturianu nel que poder prebar sidra y mercar dellos productos del país, como fabes, quesos o chorizu.

El momentu más importante del FIMI ye’l desfile de mañana (16.30 hores, de la praça do Município a la praça do Rossio), nel que, por ser el décimu aniversariu, van tomar parte 700 mazcaritos de 30 grupos de Portugal, Asturies, Lleón, Cantabria, Zamora, Salamanca, Andalucía, Cáceres y la isla mediterránea de Sardigna, presente per primer vegada con los Budhos de Orani. El representante asturianu va ser Los Sidros y La Comedia, mazcarada que yá lleva dende ayeri animando’l festival.