A la gueta los sueños
A la gueta los sueños
A la gueta los sueños

Noticies

Consuelo Vega presenta l'Axenda Didáctica Escolar

Músicos y cantantes como Anabel Santiago, Chus Pedro (Nuberu), Toli Morilla o Xune (Dixebra), grupos de teatru como Quiquilimón, Kumen o Higiénico Papel, monologuistes como Milio'l del Nido, o escritores como Vicente García Olvia, ofrecerán actuaciones, talleres y charres a los estudiantes de Primaria y Secundaria de tolos centros educativos que lo soliciten.
La editorial Pintar-Pintar estrena una versión n'asturianu de la so web

La editorial asturiana Pintar-Pintar acaba facer pública, pente medies de los calces que nos apurren les redes sociales, l'estrenu de la versión n'asturianu de la so páxina web. Hasta esti momentu, y pese a tratase d'una editorial qu'espubliza bien de llibros de Lliteratura Infantil y Xuvenil n'asturianu y fala, namás yera posible consultar la información tocante a la empresa y el so catálogu editorial na so versión castellana.
Yá puen consultase les actividaes de la "Axenda Didáctica Escolar"

Sol títulu de "Axenda Didáctica Escolar", la Conseyería de Cultura y Turismu pente medies de la Dirección Xeneral de Política Llingüística, presenta una nueva ufierta d'actividaes pal cursu 2009 - 2010. Como n'años anteriores l'oxetivu principal d'estes actividaes ye averar la lliteratura y la música asturiana al públicu mozo de la mano d'escritores, actores y músicos. D'esta manera tanto les actividaes ufiertaes pa la Educación Primaria como pa la Educación Secundaria, van cuntar cola presencia de les tres estayes: lliteraria, musical y teatral.
La LLIX n'asturianu ta presente nel especial de la revista CLIJ

La revista Cuadernos de Literatura Infantil y Juvenil (CLIJ) dedica'l so númberu d'ochobre al panorama de la Lliteratura Infantil y Xuvenil a nivel estatal. Nesi contestu especialistes na lliteratura pa la reciella de les diferentes llingües del estáu faen, al traviés de dellos artículos, un repasu peles producciones del añu y les perspectives de futuru del panorama editorial y creativu.
Ismael González Arias gana’l II Premiu “María Josefa Canellada”

La obra “Les puertes del paraísu” del escritor Ismael González Arias ta acabante de ser premiada cola segunda edición del “María Josefa Canellada” de lliteratura infantil y xuvenil n’asturianu. El premiu, empobináu pola Conseyería de Cultura, foi dau a conocer esti mediudía na Casa de Cultura “María Josefa Canellada” de Santolaya (Cabranes) y el xuráu valoró da-y por unanimidá’l premiu por “ser una novela dirixida a un públicu xuvenil, pero que pue interesar tamién al adultu”.
García Oliva fala de la necesidá d'ellaborar una Historia de la LLIX n'asturianu

L'escritor y académicu de la llingua Vicente García Oliva presentó dientro del marcu de les Xornaes d'Estudiu qu'organiza l'Academia de la Llingua na Facultá de Filoloxía de la Universidá d'Uviéu, la charra titulada "Apuntes pa una Historia de la Lliteratura Infantil y Xuvenil (LLIX) n'asturianu". Historia, qu'a xuiciu del escritor "a trenta años del nacimientu de la LLIX n'asturianu yá ye hora d'atropar estos materiales y esponelos, de forma curiosa, a la lluz pública".
Xugando col pallabreru

Un  nuevu xuegu s'axunta a los ufiertaos na páxina d'A la gueta. Nesti casu ye'l tituláu "A la gueta la pallabra", un pasatiempu que pretende, pente medies d'una dinámica asemeyada al clásicu xuegu del "aforcáu"; arriquecer el pallabreru n'asturianu de los más mozos.
D'esti mou enantes de qu'agotar tolos intentos y, poro, caer al agua, tendremos que dar cola pallabra escondida xugando al aciertu y al error col alfabetu asturianu.
Edítase un DVD interactivu sobre cultura asturiana

Coincidiendo col I Festival del Llibru Infantil y Xuvenil que se celebró la pasada selmana nel conceyu de Villaviciosa, tuvo llugar la presentación del DVD "Xana y Colás. Vivir n'asturianu", editáu pola Conseyería de Cultura y Turismu en collaboración cola Mancomunidá de la Comarca la Sidra.
El DVD, que fue presentáu nel Teatru Riera de La Villa pol responsable de normalización llingüística de la Comarca, Pablo X. Suárez; consiste nuna serie de xuegos interactivos que busquen esparder el conocimientu de la cultura asturiana y, mui especialmente, el mundu de la sidra, pente medies del xuegu.
Convóquense dos nueves actividaes de formación pal profesoráu d'asturianu

Los Centros pal Profesoráu d'Avilés y Xixón tienen yá convocaes dos actividaes empobinaes d'un mou específicu a los docentes de Llingua Asturiana.
Nuevos títulos pa la Biblioteca d'A la gueta

Yera hora de facer repasu de les novedaes editoriales de Lliteratura Infantil y Xuvenil n'asturianu y facenos coles que nos paecíen más prestoses. Nesti casu los llibros esbillaos, y poro incorporaos a les estanteríes cada vuelta más cargaes de la Biblioteca d'A la gueta, fueron: l'álbum d'Esther García y Borja Sauras "Menú de Versos"; el llibru de Xulio Berros con ilustraciones d'Enrique Carballeira "Toya yá ye grande"; la vuelta a la lliteratura infantil n'asturianu que supón "Arbolín" de Carmen Gómez Ojea y la obra ganadora del Primer Premiu MªXosefa Canellada "Arroz, agua y maíz".