Los socios del UC Ceares voten el cambiu de nome pa usar el topónimu tradicional Ciares

Los más de 500 socios del UC Ceares tán convocaos esti domingu a les urnes. Van votar el cambiu de denominación del club pa usar el topónimu tradicional del barriu xixonés, Ciares.

L'aniciu de la votación ta previstu pa les 17 hores, 60 minutos enantes del comienzu del partíu de Tercera División correspondiente a la xornada 37 contra'l CD Covadonga. Los socios van tener qu'escoyer ente dos opciones: UC Ceares, la que s'utilizó dende la so fundación nel 1946, o UC Ciares, respetando asina'l nome tradicional del barriu. La razón d'esta votación ye una propuesta d'un sociu, apoyada por mayoría n'asamblea, aprovechando los trámites que tenía previsto facer el club pa iguar una modificación sufrida nel nome del club a finales de los años 90 por decisión de los direutivos de la época, ensin consulta previa a la masa social, que fai que la so denominación oficial anguaño sía ‘Unión de Ceares Gijonés'. Les urnes van zarrase a les 21 hores.