González confirma qu'en Bachilleratu va haber namái una hora de Llingua Asturiana

La conseyera Ana González esplicó'l martes los conteníos de los decretos de currículu pa Secundaria y Bachilleratu. La Llingua Asturiana da un pasu atrás na etapa última.

Asina, como yá s'anunciara, la materia ve reducida nun 75 por cientu'l númberu d'hores selmanales, pasando de les cuatro qu'había esti cursu a una. Mentes, en Secundaria continúa como optativa, compitiendo con otres materies, anque González destacó qu'en cuarto de la ESO aumenta de dos a trés sesiones llectives selmanales. A nivel xeneral, l'adaptación que fai'l Gobiernu a la LOMCE lleva a un refuerzu de Matemátiques en Secundaria y de la primer llingua estranxera, en Bachilleratu.

González presentó estos decretos de currículu, en trámite alministrativu nestos momentos, mientres la Xunta Xeneral acoyía la llectura institucional de la Selmana de les Lletres Asturianes, na que la Conseyería d'Eduación, Cultura y Deporte tuvo representada por Ana María Fueyo, direutora xeneral de Política Llingüística.