Entró'l 4+ en 8 conceyos ensin toques de queda

|
Tribunal Superior de Xusticia d'Asturies (TSXA)

El TSXA refuga'l pidimientu del Gobiernu pa la restricción de la movilidá nocherniega, pero sí permite la llende d'aconceyamientos. Los contaxos baxen de 423 diarios de media a 289.

Carreño, Xixón, Gozón, Llaviana, Mieres, Uviéu, Siero y Villaviciosa entraron güei en nivel d'alerta 4+ per 14 díes al superar una incidencia acumulada a 14 díes de 350 casos cada 100.000 habitantes. Finalmente nun va haber toque de queda de 1 a 6 hores, pero sí que nun tán permitíos los axuntamientos de más de 10 persones non convivientes n'esteriores y recomiéndase nun pasar de 6 n'interiores pa tratar de controlar una tresmisión del coronavirus SARS-CoV-2 que paez tar amenorgando nesta cuarta fola tres algamar el récor d'incidencia de tola pandemia.

Coincidiendo cola visión de la Fiscalía, el Tribunal Superior de Xusticia d'Asturies (TSXA) refugó la solicitú del Gobiernu, que nun va recurrir l'autu, no que respeutaba a la restricción de la movilidá nocherniega. Entiende qu'afeuta a derechos fundamentales y que, pola situación sanitaria actual d'Asturies, nun da llugar a esta midida.

Descensu de la curva

Los datos de los últimos díes confirmen el descensu de la curva de la pandemia nesta cuarta fola. La selmana principió con 64.939 casos y finó con 66.961, lo que supón 2.022 contaxos, cuando nes anteriores rexistráronse 3.449 y 2.962.

La media de positivos diarios asitióse asina en 289. Dende qu'entamó la tercer fola la evolución foi la siguiente: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493 y 423, hasta los 289 actuales.

No que respeuta a la fin de selmana, la Conseyería de Salú comunicó 664 casos nuevos: 284 el vienres, 222 el sábadu y 158 el domingu, con una tasa de positividá nesta xornada del 9,80 por cientu. Nes dos últimes informóse de 1.355 y 1.172.

Otra manera, la tasa de positividá a 7 díes entantes de l'actualización yera'l xueves del 13,49 por cientu –ayeri baxó al 11,91 por cientu–.

4 finaos

Estos díes hai que llamentar la muerte de 4 persones, qu'aumenten el total de finaos a 2.004. El vienres perdieron la vida cola enfermedá causada pol coronavirus SARS-CoV-2 una muyer de 81 años y un home de 56, y el sábadu de 77 y 49, de manera respeutiva.

153 pacientes hospitalizaos con confirmación o sospecha de COVID-19, 6 menos que'l xueves. Mentes, siguen na UCI otros 30.

Na semeya, sede del TSXA.

Contador Estadistiques