La Fiscalía ve "desproporcionao" poner toques de queda

|
Vacuna Comirnaty de Pfizer

Sí considera xustificao la limitación de los aconceyamientos al nun suprimir dafechu esti derechu. Esti xueves rexistráronse 347 casos.

L'informe de la Fiscalía remitíu al Tribunal Superior de Xusticia (TSXA) sobre'l pidimientu del Gobiernu pa poder poner restricciones como'l toque de queda de 1 a 6 hores nos conceyos con alta tresmisibilidá del coronavirus SARS-CoV-2 y la llende de 6 persones n'interiores y de 10 n'esteriores, ve bien la segunda midida, pero non la primera. Considera "desproporcionao" restrinxir la movilidá.

Al tratase de derechos fundamentales, ye necesario'l preste del TSXA pa poder activar estes restricciones. Son 8 los conceyos nos que s'implantaríen: Carreño, Xixón, Gozón, Llaviana, Mieres, Uviéu, Siero y Villaviciosa.

Un fináu

A falta de la espublización de los datos oficiales de la COVID-19, la Conseyería de Salú informó de la detección de 347 casos nuevos ayeri –l'actualización aumenta la cifra a 350 por casos non contabilizaos en díes anteriores–. Son 25 menos que'l miércoles, cuando comunicó 372.

El Serviciu de Salú del Principáu d'Asturies (SESPA) fixo'l 3.614 pruebes de diagnósticu d'infeición activa, polo que la tasa de positividá quedó nel 12,83 por cientu, inferior tamién a la xornada anterior, cuando foi del 13,58 por cientu. A 7 díes esti porcentaxe yera enantes de l'actualización del 13,52 por cientu –ayeri baxó al 13,49 por cientu–.

Hebo que llamentar una muerte, la d'un home de 67 años. Ye la 2.000 del andanciu.

160 pacientes tán hospitalizaos con confirmación o sospecha de COVID-19, a los qu'hai que sumar otros 30 ingresaos na UCI. Son 4 y 2 más que'l miércoles.

Na semeya, viales de la vacuna Comirnaty de Pfizer/BioNTech. Esta selmana recibiéronse dosis 36.270 d'ella y 13.200 de la Spikevax de Moderna.

Contador Estadistiques