Sigue la baxada de contaxos: 194 diarios de media la selmana pasada

|
Coronavirus SARS-CoV-2 con espaciu

Nel periodu del 19 al 25 de xunetu esta cantidá taba en 423 y nel siguiente, en 289.

La selmana pasada principió, llueu d'una revisión, con 66.963 casos confirmaos de COVID-19, cantidá qu'ayeri taba en 68.322 según los datos comunicaos pola Conseyería de Salú –l'actualización suma 2 más–. Son 1.359 casos nuevos, polos 2.022 de l'anterior, una media diaria de 194 contaxos.

La cuarta fola, poro, sigue en tendencia descendente. Dende qu'entamó la evolución foi la siguiente: 51, 57, 196, 448, 493, 423 y 289, hasta los 194 actuales.

Esta fin de selmana rexistráronse 551 casos nuevos, cuando na anterior comunicáronse 664. El vienres hebo 298, el sábadu 152 y ayeri 101, xornada con una tasa de positividá diaria del 8,95 por cientu.

A 7 díes esti porcentaxe yera enantes de l'actualización del 10,02 por cientu –ayeri siguía siendo la mesma–. Ye'l doble del 5 por cientu que marca la Organización Mundial de la Salú (OMS) como referencia a partir de la que s'empieza a perder el control de la pandemia.

4 finaos

Hebo que llamentar la muerte de 4 persones esta fin de selmana: la dos homes de 86 y 78 años y una muyer de 75 el sábadu, y la d'un paisanu de 84 ayeri. Estos finaos faen aumentar a 2.021 la cantidá total de persones que finaron cola enfermedá causada pol coronavirus SARS-CoV-2 –l'actualización incorpora ún más hasta 2.022–.

112 pacientes tán hospitalizaos con confirmación o sospecha de COVID-19, 6 menos que'l xueves. Otros 35 siguen na UCI, mesma cifra que na actualización última.

Contador Estadistiques