Asturies entra en grau mediu d'ocupación hospitalaria y prepárase p'activar el nivel 4+

|
HUCA

Habrá toque de queda en 6 díes nos conceyos con más tresmisión previo preste del TSXA. La selmana pasada rexistróse una media de 423 contaxos diarios polos 493 de l'anterior.

Como pronosticaben les autoridaes sanitaries, Asturies entró en grau mediu d'ocupación hospitalaria esta fin de selmana. La comunicación última de la Conseyería de Salú, a la espera de la espublización de los datos oficiales, asitia nun 5,38 por cientu la ocupación actuales de cames convencionales y un 9,06 por cientu nes UCI, cuando'l criteriu que se marca pa ello ye del 5 y del 10, de manera respeutiva.

Cuando Salú confirme la entrada al nivel d'alerta 2 qu'afita'l Ministeriu de Sanidá que provoca tener un grau mediu d'ocupación hospitalaria, empezaría la cuenta atrás pa que los conceyos con una incidencia acumulada mayor a 350 casos cada 100.000 habitantes en 14 díes pasen a tar en nivel d'alerta 4+. Activaríase entós el toque de queda de 1 a 6 hores, llendaríense los axuntamientos a 6 persones n'interiores y a 10 n'esteriores, y se revisaríen tolos eventos multitudinarios previstos.

Pa decretar les dos primeres restricciones el Gobiernu va tener que solicitar el preste al Tribunal Superior de Xusticia d'Asturies, pasu que, según confirmaron les autoridaes, se fadrá nel momentu nel qu'un conceyu cumpla colos 3 díes d'ocupación media y nivel 4 del ministeriu y otros 3 cola incidencia acumulada superior a 350. Nestos momentos son dellos los conceyos que lo superen.

Otra manera, prorrógase hasta'l 9 d'agostu'l zarru del interior del ociu nocherniegu y la venta d'alcohol más tarde de les 22 hores en comercios y gasolineres.

Baxada de casos

L'aumentu de la hospitalización, con 153 pacientes en planta con confirmación o sospecha de COVID-19 y otros 27 na UCI, 15 y 7 más que'l xueves, de manera respeutiva, nun frena, pero los contaxos entamen a baxar magar que siguen siendo mui altos. La selmana pasada principió, llueu d'una revisión, con 61.974 casos confirmaos y finó con 64.936 –l'actualización aumenta la cifra a 64.952–, lo que suponen 2.962 nestos 7 díes, cuando nel periodu anterior rexistráronse 3.449.

Son una media de 423 positivos diarios, cifra menor que nes dos selmantes previes. Dende qu'entamó la tercer fola la evolución foi la siguiente: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448 y 493, hasta los 423 actuales.

Na fin de selmana detectáronse 1.172 casos –l'actualización aumenta esta cantidá en 8 más–, polos 1.355 de l'anterior. El vienres comunicáronse 591, el sábadu 339 y ayeri 242, con una tasa de positividá diaria esti día últimu del 12,50 por cientu cuando esti porcentaxe a 7 díes el xueves yera del 14,11 por cientu –ayeri baxó al 14,09 por cientu–.

Trés finaos

Estes xornaes hebo que llamentar 3 muertes, un home de 88 y una muyer de 61 el sábadu, y una señora de 94 ayeri. Dende qu'entamó l'andanciu finaron 1.992 persones cola enfermedá causada pol coronavirus SARS-CoV-2.

Na semeya, l'Hospital Universitariu Central d'Asturies (HUCA), el centru con más pacientes COVID-19.

Contador Estadistiques