El Gobiernu pide al TSXA prorrogar la llende d'axuntamientos nel esterior en 6 conceyos

|
Pablo Ignacio Fernández Muñiz Conseyu Interterritorial del Sistema Nacional de Salud

Llaviana y Mieres salen de la llista. Esti martes rexistráronse 175 casos nuevos de COVID-19.

El domingu pela nueche finen les restricciones del nivel d'alerta 4+ en 8 conceyos. Ente elles ta la llende d'axuntamientos de 10 persones non convivientes n'espacios esteriores, midida que'l Gobiernu quier prorrogar por otros 14 díes.

Pa ello ha contar otra vegada col preste del Tribunal Superior de Xusticia d'Asturies (TSXA) al afeutar a derechos fundamentales. De tenelu, esta limitación d'aconceyamientos va siguir vixente, pendiente de la evolución de la pandemia en cada llugar estos díes, en Carreño, Xixón, Gozón, Uviéu, Siero y Villaviciosa.

L'ameyoramientu de los datos en Llaviana y Mieres permiten a estos conceyos dexar el riesgu estremu. Nel primeru había'l llunes una incidencia acumulada a 14 díes de 225,12 casos cada 100.000 habitantes y nel segundu, de 181,16, cuando la llende pa entrar ye de 350.

Ensin finaos

A falta de la espublización de los datos oficiales de la COVID-19, la Conseyería de Salú anunció la detección ayeri de 175 casos nuevos –l'actualización resta 2 por duplicaos en díes previos–. Son 26 más que'l llunes, cuando se comunicó 149.

La tasa de positividá tamién ye mayor, del 9,05 por cientu con 2.454 pruebes de diagnósticu d'infeición activa, cuando la xornada anterior foi del 6,55 por cientu con 2.535 tests realizaos. A 7 díes esti porcentaxe yera enantes de l'actualización del 9,72 por cientu –ayeri baxó al 9,64 por cientu–.

Hai que celebrar l'ausencia de finaos cola enfermedá causada pol coronavirus SARS-CoV-2. Hasta la fecha 2.025 persones perdieron la vida pol andanciu.

Mentes, 99 pacientes tán hospitalizados con confirmación o sospecha de COVID-19, 15 menos que'l llunes. Otros 35 siguen na UCI, mesma cifra que nos dos díes últimos.

Na semeya, el conseyeru Pablo Ignacio Fernández Muñiz esta mañana nel Conseyu Interterritorial telemáticu del Sistema Nacional de Salud.

 

Contador Estadistiques