La Xira pola Oficialidá arranca con una primer parada en Bimenes

|
Iván Llera y Carlos Rubiera presentación Xira pola Oficialidá

Del llunes al vienres Bimenes va acoyer actividaes alredor del asturianu. El conceyu yerbatu ye la primer parada de la Xira pola Oficialidá, campaña informativa entamada pola Fundación Almastur y Iniciativa pol Asturianu que busca concienciar, tanto dientro como fuera del país, sobre la necesidá del reconocimientu llegal de les llingües d'Asturies.

Les organizaciones presenten, en collaboración col Conceyu, un completu programa cola Casa Cultura de Santuyano como sede que va entamar el llunes a les 19 hores cola inauguración institucional de la esposición 'Voces: la llingua n'Asturies al traviés de los sieglos' que va poder visitase estos díes y la presentación de la Xira pola Oficialidá en Bimenes. Darréu va proyeutase’l documental ‘De güeles a nietes. El retu de la tresmisión xeneracional del asturianu’, obra de Cuatro Gotes Producciones, estrenáu’l sábadu nel III Seminariu ‘Oficialidá, el camín constitucional de futuru pal asturianu’ qu’entamó Iniciativa pol Asturianu na Aula Magna del Edificiu Históricu de la Universidá d’Uviéu.

El vocal y ex presidente del coleutivu, Inaciu Galán, va poner mañana a les 19.30 hores una charra entitulada ‘¿Por qué sí a la oficialidá del asturianu?’ na que va esplicar en qué consiste la oficialidá y qué implicaciones va tener. El xueves, a la mesma hora, convídase a Ramón d’Andrés a protagonizar la charra-coloquiu ‘Toponimia de Bimenes. Lo que mos diz el nome de lo pueblos’.

La ‘Xira pola Oficialidá’ va rematar la so primer parada’l vienres 28, tamién a les 19.30 hores, con una apertura musical a cargu de la cantante de tonada Mariluz Cristóbal Caunedo. Depués de la so actuación, el Conceyu de Bimenes va entamar un actu de reconocimientu del XXV Concursu de Cuentos pola Oficialidá del Asturianu, p’acabar l’actu cola llectura d’un manifiestu pola oficialidá por parte de los organizadores.

Madrid, más conceyos y otres autonomíes

El formatu emplegáu en Bimenes va repetise n’otros conceyos nos meses próximos col oxetivu de llevar a la mayor cantidá de sitios la “defensa de la llingua asturiana y del derechu constitucional que ye la oficialidá”. Madrid ta previsto que sía la siguiente parada gracies a la collaboración del centru asturianu de la capital del Estáu, yá que tamién ta previsto salir a otres autonomíes, sobre manera aquelles que tienen llingua propia, pa dar a conocer la situación llegal del asturianu y del gallego-asturiano.

Na semeya, Iván Llera, presidente d'Inciativa pol Asturianu, y Carlos Rubiera, presidente del Patronatu de la Fundación Almastur, na presentación del conveniu de collaboración ente les dos entidaes celebráu en febreru nel llar social del Atenéu Obreru de Xixón.

Contador Estadistiques