Miguel Rodríguez Monteavaro recibe'l premiu del XXV Concursu de Cuentos pola Oficialidá del Asturianu

|
Esposición 'Voces' en Bimenes Xira pola Oficialidá

L'actu pieslla les actividaes de la Xira pola Oficialidá, que programa tamién una actuación de Mariluz Cristóbal Caunedo, en Bimenes.

El cuentu 'Tucapel' de Miguel Rodríguez Monteavaro llevó l'añu pasáu'l Concursu de Cuentos pola Oficialidá del Asturianu, que va ser reconocíu polos organizadores de la Xira pola Oficialidá, nuna edición especial por cumplise 25 años de la declaración d'oficialidá nel conceyu yerbatu. Mañana va facese l'actu d'entrega del premiu a les 19.30 hores na Casa Cultura de Santuyano.

L'escritor bualés va tar acompañáu por Solinca Turbón y Gonzalo G. Barreñada, merecedores del segundu y tercer premiu coles histories 'Teresa' y 'Verde como los sos güeyos', de manera respeutiva. Van facer una llectura del cuentu ganador y de poemes.

El Conceyu Bimenes nesta edición del concursu fixo un esfuerciu económicu p'amuentar la cuantía de les recompenses. Asina, dedica a esti gallardón 1.525 euros repartíos en 700, 525 y 300, lo que supón una medra de 175 euros con respeuto a l'anterior.

La xornada complétase con una apertura y un pieslle musical por parte de Caunedo y cola llectura previa del Manifiestu pola Oficialidá de la Fundación Almastur y Iniciativa pol Asturianu, organizaciones qu'entamen la Xira pola Oficialidá.

Güei, charra sobre toponimia con D'Andrés

Esta tarde siguen les actividaes de la Xira pola Oficialidá cola charra-coloquiu ‘Toponimia de Bimenes. Lo que mos diz el nome de lo pueblos’ a cargu de Ramón d'Andrés. Va ser a tamién a les 19.30 hores na Casa Cultura de Santuyano y nella va afondar nos nomes del llugar del conceyu.

Amás, hasta mañana pue visitase nesi mesmu llugar la esposición 'Voces: la llingua n'Asturies al traviés de los sieglos' sobre la historia de la llingua nel país.

Na semeya, delles persones lleen los paneles de la esposición que forma parte de la programación de la Xira pola Oficialidá.

Contador Estadistiques