Los abogaos de la Memoria Histórica creen que'l Supremu quier que "s'olviden los crímenes del franquismu"

Los abogaos que defendieron la causa de la Memoria Histórica aseguraron güei que la denuncia almitida a trámite pol Tribunal Supremu contra'l xuez de l'Audiencia Nacional Baltasar Garzón por prevaricación pretende que "se olviden los fechos criminales cometíos pola Dictadura franquista".

   Nun comunicáu los lletraos aseguraron que la denuncia presentada pol sindicatu Manos Limpias, al que califiquen de "organización de conocida tendencia ultra", supón un "despreciu a les víctimes" y a les families que "siguen lluchando pola reconocencia de la dignidá de los sos seres queríos".

   Na so opinión, l'actuación xudicial contra Garzón pretende "atacar" la so función como maxistráu, "col propósitu de minar la independencia, el so prestixu y el so propiu llabor xurisdiccional, señaladamente na causa contra'l franquismu y tamién n'otres nes que tuvo oportundiá d'actuar como instructor".

  L'escritu ta firmáu polos lletraos Fernando Magán, Bernardo García, Leo Babdilla, Francisco Sánchez, Francisco Palomo y Antonio José Vélez. Toos ellos consideren que la querella "nun tien nengún fundamentu fácticu y xurídicu, resultando, una midida de presión refugable a l'actividá del titular d'un órganu xudicial nel exerciciu de la so función xurisdiccional".

   Según estos lletraos, el Supremu "debe correxir cola mayor rapidez la situación creada al almitir la infundada denuncia", con oxetivu de "reponer darréu la consideranza intachable en tolos ordes" del xuez Garzón, que, según aseguren, "ye reconocida equí y internacionalmente, ente otres razones, pola persecución n'España de crimes d'análoga naturaleza cometíos por crueles dictadures n'otres partes del mundu".