Llibru estrella

Ver llibru anterior

¡TOL MUNDU A ESCENA!

Entá nun s'esmucieron los ecos de los aplausos colos que la crítica y el públicu acoyeron Maruxes y Xuanes, cuando Montse Garnacho vuelve a sorprendenos asoleyando un puñáu de cuentos populares que'l so alumnáu representó, con otru esitazu d'aúpa, nel II Certame de Teatru Escolar Villa de Mieres.

La sal y el formientu ye un títulu bien afayadizu, porque de la mesma manera qu'un pizcu sal y un poco formientu son imprescindibles pal bon tastu del pan, la picardía y la doble intención son la chispa de la vida. Una vida qu'alita en caúna d'estes estampes asturianes y universales al empar. Universales pola intención de deprender xugando y pol fondu de los asocedíos: qu'hai que ser mui cuciu pa salvar la pelleya, que la esperiencia ye la madre de la ciencia, que... Y asturianes pola retranca cola que se cuenten y pola sicoloxía de los personaxes.

¿Y la llingua? La llingua asturiana ye'l sofitu y el núcleu d'unos diálogos áxiles, la erbia amañosa tanto pal versu como pa la prosa, l'instrumentu de comunicación qu'empleguen gatu y el raposu, el llobu y la cabra, el rei y la criada...

Mentantu naguamos por probar los resultados d'El formientu y la sal que yá s'anuncia, estos frutos de La sal y el formientu, decoraos colos dibuxos de Berto Vázquez asemeyando bocetos teatrales, son una invitación a lleer y representar que nun pues refugar: ¡Venga: tol mundu a escena! ¡Y tu tamién!