|
|
|
|
||
Indiz / Entamu/ Los llibros de l'alcordanza/Ficha didáutica /Escoyeta de llibros/Llibru estrella /El rinconín de los suaños/Entrevista /Música
HAI QUE SE COMPROMETER COL CAMBIU
| GARNACHO, Montserrat Maruxes y Xuanes Trabe, Uviéu, 2000, 58 p.,(Montesín, 20), Ilustráu por Toni Vila |
| MARUXA: | ¡Á Xuan! ¡Ven cuerri, qu'acaben de conectase a la nuesa páxina! |
| XUAN: | Un momentín que termine fregar la cacía y toi ehí. ¿Qué ye Maruxa o Xuan? |
| MARUXA: | Nun sé, pero tien que ser una persona intelixente porque quier saber daqué de nós, o seya, quier afondar nos personaxes de Montse. |
| XUAN: | ¡Alto ehí, ne! ¡Para'l carru, que yo nun soi nengún personaxe! |
| MARUXA: | Nin yo tampoco, ho. Yá se ve que tu yes un home modernu que friega los platos mentanto la muyer navega per internet |
| XUAN: | ¿Ves? Lo que yo digo, xusto lo contrario de lo que pasa nesa comedia en tres actos. |
| MARUXA: | Lo que Montse retrata, eso sí: con muncho humor, ye la realidá mesma, ¿o vas dicime que non? |
| XUAN: | Nun te sulfures, ne, que tienes un prontu tan malu como la Maruxa de la obra. |
| MARUXA: | Home, qu'haiga dos o tres esceiciones nun quita pa que'l machismu siga dominando nes rellaciones de pareya, nel repartu de los roles sociales y, entá más, a la hora acostinar coles xeres de casa. |
| XUAN: | Ehí ye onde se nota lo bien que Montse ta ensertada na vida de cutiu y que la ve dende dos puntos de vista complementarios: dende dientro, como maestra, y dende fuera, como periodista. |
| MARUXA: | ¿Periodista? |
| XUAN: | ¿Ves como te sal la zuna? ¿A que te llama l'atención lo de periodista? Pues pa saber que lo ye nun fai falta navegar per internet, tienes bastantina con averate a les llibreríes y echar una gueyada a les sos recopilaciones d'artículos como Caleyes con oficiu, ¿Sales a jugar un poco? o Donde la culebra canta, o la biografía en tebéu del bandoleru Constatino Turón, o un puñáu d'obrines de teatru pa neños acabante salir con un título tan prestosu como El formientu y la sal. |
| MARUXA: | ¿Ves? Yá tas saliéndote de lo que cuntabes: para un poco en Maruxes y Xuanes. Pámique tu quedasti na música ensin deprender la lletra. |
| XUAN: | Si quies que te diga que ye una pieza costumista na llinia d'aquelles que representaba la Compañía Asturiana de Comedies plagaes de situaciones risibles... |
| MARUXA: | Non, guapín: tas mui enquivocáu. La obra plantega un problema pervieyu que se repite y se repite hasta qu'un personaxe, femenín, claro, s'arremanga y taraza esi círculu viciosu. |
| XUAN: | ¡A ver, a ver! Cuéntamelo despacio. |
| MARUXA: | Estes coses nun son pa cuntales,son pa lleeles ún mesmu, pa pasalo bien, pa disfrutar tamién de les ilustraciones de Toni Vila, pa reflexonar un migayu, pa comprometese... |
| XUAN: | Entendío, entendío. Aceuto'l brinde. |
| MARUXA: | Voi ponételo entá meyor: tanto a ti como a la persona que nos visita, emplázovos a que, acabante lleer o relleer el llibrín, mandéis les vueses impresiones a alagueta@telecable.es. Vais ver lo que da de sí un testu perguapu y bien escritu. |
| XUAN: | ¡A ver cuántos xuanes se comprometen a cambiar! MARUXA: ¡Y a ver cuántes maruxes tán de verdá dispuestes a apodrellar el cambiu! |
Indiz / Entamu/ Los llibros de l'alcordanza/Ficha didáutica /Escoyeta de llibros