|
|
|
|
||
Indiz / Entamu/ Los llibros de l'alcordanza/Ficha didáutica /Escoyeta de llibros/Llibru estrella /El rinconín de los suaños/Entrevista /Música
Esti rinconín quier ser un llugar prestosu pa vosotros, los más pequeños. A la ñube los suaños prestaría-y asgaya cuntar cola vuesa collaboración. Si sabéis daqué chiste, cosadiella, xuegu, cuentín , poema...o simplemente queréis poner a la ñube de color verde porque nun vos gusta un res el rinconín, podéis facelu a la dirección qu’apaez darreu
DEBAXU LA PONTE
Los xugadores tán asitiaos nún círculu tocando les sos palmes al centru y les palmes de los sos collacios a la mandrecha y a la manzorga, demientres cancien:
"Debaxu la ponte,
sal de repente,
una burbuyina cola so cabecina.
¿Verdá que suena bien?... ¡Tilín,tilín,tilín!(con voz sele)
¿Verdá que suena mal?... ¡Tolón, tolón,tolón!. ( con voz grave)
el que se ría o o se mueva,
tien la cara de melón o sinón de babayón
Pierde'l xuegu al que-y entre la risa como diz la canción
L'ESCONDERITE
Un grupu quédase,mentantu'l restu escuéndense en cualesquier llugar pero ensin salir de les llendes marcaes por tolos xugadores. El que se queda tien que buscalos, si foren pillaos , perderíen el xuegu. El prósimu en quedase sedrá'l caberu que nun "alce la maya" (sitiu onde tien que tar el que se queda, demientres fae la cuenta pa que los xugadores puean escondese).El restu tien que tocar esi llugar,ensin ser sorprendíos pol que se queda.
AL CUCURUCÚ
Ún de los xugadores tien que ser el númberu ventiún ( por sortéu). Esti xugador tien que cuntar fasta ventiún demientres los otros s'escuenden. Cuando termina diz al altu la lleva:
"Ventiuna y aceituna" y va a la gueta'l restu. Si atopa daquién y ye quien a tocalu diz-y: "A frega'l palu". Quédase'l pilláu y entama'l xuegu otra vuelta.
PA XUGAR COLA COMBA
· A un saltu
Hai que seguir la cuerda saltando ún de cada vez y diciendo:
"La una, la otra, la potra, el potrín, el potrón, la que pierde al rincón"
· A dos saltos
"Una y dos, les ventidos, los tres gochinos, el llobu feroz, capiellina cola so güelina, barre la cocina, llimpia'l comedor, con pata de pitina... ( el nome de quien-y tocara blincar) la gochina
· Por pareyes
"Pareya con pareya nun pue ser. Lo que diz l'home, lo repita la muyer".
Al finar la canción, los dos xugadores tienen que quedar cola cuerda ente les piernes.
PA XUGAR COLA GOMA
· Chicle,bazola
Hai que salir y entrar na goma ensin fincala y van xubiéndose les altures demientres se diz:
"Chicle, bazola, estira y esplota"
· La madreña
Ún de los xugadores fae los movimientos que quier cola goma y el restu tien que facer lo mesmu. Si dalguién s'enquivoca pierde y tien que ponese pa sostener la goma. La goma sólo xube fasta'l culu
EL CASCAYU
Píntase un rectángulu en suelu dixebrándolu en seis partes. Cada parte tien un nome: Primera, Segunda, Descansu, Cascayu y Cielu.Hai que tirar la tángala a los distintos rectángulos entamando primero pol que ta más cerca, La tángala hai qu'emburriala a la pata coxa. El xugador que pise o dexe la tángala enriba una les rayes, pierde.
AL SILLÓN DE LA REINA
Dos de los xugadores gárrense colos brazos faciendo una siella onde'l tercero va sentase garrándose al pescuezu de los otros dos.Llevántenlu y demientres lu cañiquen dicen esti canciu: Al sillón de la reina que nunca se peña un día peñóse y el sillón... ¡Rompióse! Cuando dicen "rompióse", déxenlu cayer al suelu.
LA QUEDA
Nun grupu quédase ún namai. Tien que tocar a otru ensin salir de la zona enantes marcada.
EL PAÑUELU
Fórmense dos equipos asitiaos en dos bandes quedando un neñu en mediu con un pañuelu na mano.Cada equipu tien un númberu. El del pañuelu diz un númberu cualesquiera. Los xugadores de cada equipu a los que-yos corresponda esi númberu tienen qu'echar a correr a pol pañuelu. Si ún lu garra,l'otru tien que pillar al xugador enantes que llegue a la so banda. Si lu pilla, queda elimináu. Si dalgún xugador pasa la llinea'l mediu enantes de garrar el pañuelu tamién pierde. Gana l'equipu que tenga más xugadores.
LES CUATRO ESQUINES
Xueguen cinco neños nun cuartu: cuatro nes esquines y ún en mediu qu'intentará llegar a daqué esquina cuando los otros cambien de sitiu.
EL ZAPATU, LA ZAPATIELLA,L'ALPARGATA
Los xugadores formen un círculu coles manes na espalda en cuclilles o per baxu les piernes pa garrar el zapatu. El que ta nel mediu tien que güeyar quién tien el zapatu. Si apunta pa daquién y nun lu tien, entós quien lu tien llevántase y dá-y col zapatu na espalda.Vuelve al so sitiu pasándo-y el zapatu al so collaciu y diciendo: "cuerra'l zapatu".Repitiendo de nuevu'l xuegu. Si acierta quien lu tien, ponse nel mediu a quien se pilla col zapatu.
TRES NAVÍOS
Fórmense dos equipos, ún d'ellos quédase mentantu l'otru va escondese. Cuando yá tan escondíos glayen: "¡Tres marinos a la mar!", entós van a la gueta d'ellos glayando: "¡Y otros tres a navegar!". Los que tan escondíos tienen que tornar al sitiu determináu. Si dalgún del otru equipu los ve, glayen: "¡Tierra descubierta!".Entós los escondíos son los que se quedan pa pillar a los otros.
EL BURRIQUÍN
Sentáu’l nenu enriba la rodía, muévese ésta asemeyando’l trote d’un burru, mentanto se diz:
Va la señorina Arre, arre, burriquín,
de la sala a la cocina pa casa de Xuan Martín;
tipitina, tipitina. Xuan Martín nun taba en casa,
diba’l señorón arre burriquín pa casa.
de la sala pal salón,
tiquitón, tiquitón.
LOS MADERINOS
Setando al neñu enriba les rodíes muévese p’alantre y p’atrás coyéndolu peles manes mentanto se diz:
Aserrín, aserrán
maderinos de San Xuan;
los del rei sierren bien,
los de la reina tamién,
los del duque:
truque,truque, truque
LA MOCITA
Con una de les manes del neñu, dase suavemente na cabeza mentanto se diz:
Daba la mocita,
na cabecita;
daba, daba, daba
y enxamás se mancaba
LOS CINCO LLOBINOS
Mentanto se canten los versos qu’apaecen darréu, muévese la mano abierta d’un llau a otru cola intención de que’l neñu asonsañe lo que fai l’adultu
Cinco llobinos tien la lloba
prietos y blancos baxo la so cola.
cinco llavó, cinco peñó
y tolos cinco a la escuela mandó!
LOS DEOS
Garrándo-y los deos d’una mano y entamando pol pequeñín va diciéndose lo que fizo cada deu:
Esti alcontró un güevu Esti ye’l pequeñín,
esti buscó lleña, esti, el so sobrín
esti prendió’l fueu esti, el rei de toos,
esti frió’l güevu esti, el furabollos
y esti otru, el más gordu, comiólo too, too... y esti, el matapioyos
PER ESTA RAYINA
Pasando los deos pente les llínies de la mano del neñu, cuando se ta diciendo’l versu caberu faise cosques na palma
Per esta rayina
per esta otra
si te pica la mosca,
rasca, rasca, rasca...!
L’ESCARPÍN
Según se caricien los pies del neñu dizse:
Colos pies pequeñinos
calentinos,
dientru los escarpinos,
durmivos mios neñinos
FUXIR, FUXIR
Cuando’l neñu yá camina ponse a la verina la paré faciendo que cuerra al empar que se diz:
Si te metes nun ñabal
echar en cestu y cabar;
si ves l’amu venir,
fuxir, fuxir, fuxir
LA PUERTA DE SAN VICENTE
El neñu tien que dicir lo qu’apaez darréu ensin respirar:
Pela puerta de San Vicente
pasaron palombos venti:
palombos, un,
palombos, dos,
palombos tres,
....................
palombos, venti.
VIS VEO
Xuntos unos cuantos neños ún d’ellos diz:
_Vis veo
_¿Qué ves? (contesten toos)
_Una cosina
_¿Y qué cosina ye?
Los demás tienen qu’aldovinar cuál ye l’oxetu
EL BARCU
Siéntense los neños nel suelu formando una rueda, ún d’ellos dempués de dicir una lletra, tira un pañuelu a ún de los xugadores diciendo al empar:" De La Habana vino un barcu cargáu de...". Al que- y tocó’l pañuelu tien que contestar con un sustantivu qu’empecipie pola lletra que se dixo, si nun lu fai pierde y tien que pagar una prenda.
DICEN QUE MORRIÓ’L CHORIZU
Esti xuegu de palmes faise por parexes recitando esti canciu:
Dicen que morrió’l chorizu
pa rra pan pan pan
camín de la romería
pa rra pan pan pan
yá morciella que lu supo
pa rra pan pan pan
quiso reventar de risa
pa rra pan pan pan.
LA VUELTA’L GATU
Facer carreres rodando sobre sí mesmos per un prau pindiu p’abaxo. Gana’l que llegue primero
EL CONEYU NUN TA EQUÍ
Tolos xugadores faen un corru garraos peles manes, menos el coneyu que queda fuera’l corru. Los del corru cancien asina:
El coneyu nun ta equí
Coló pa Madrid
¡Ai, ai, yá ta equí!
Na cabera frase entra’l coneyu al centru’l corru, y diz: "faciendo reverencies tú besarás a quien te guste más".
El coneyu escueye a unu o una del corru, da-y un besu y ésti o ésta pasa a ser el coneyu
LA PITA CIEGA
Ún de los xugadores tapa los güeyos (la pita ciega), y asítiase nel centru’l corru. Faise un diálogu ente la pita y los del corru:
_Pita ciega ¿qué perdiste?
_ Una aguya y un dedal
_ Da tres vueltes y los atoparás. (El corru ximielga a la pita pa desorientala)
Toos echen a correr, y la pita ciega tien que guetar y pillar a daquién. Si ye quien a garralu tien qu’aldovinar a palpu quién ye, asina’l pilláu pasa a ser pita ciega
NEL ARCA NOÉ
Tolos xugadores asitiaos en círculu, van tocando les sos palmes al centru y les palmes de los collacios de la mandrecha y manzorga, demientres cancien asina:
Nel arca de Noé,
caben toos, caben toos.
nel arca de Noé,
caben toos menos ¡TÚ!
Al finar la rima, tolos xugadores señalen col deu a cualesquier de los collacios. Al que-y apunten más, ye’l que pierde y queda elimináu. Asina, va xugándose fasta que namái queden dos, que son los ganadores.
LES PRENDES
Un xugador ye la madre colos güeyos tapaos, van dándo-y coses y tien que dicir al garrar caúna:
De quien seya esta cosa
tien que facer...
Y diz un mandáu que’l propietariu la prenda tien que cumplir
LA GALLINA POPOZADA
Daquién fae de madre y el restu forma un garrapiellu sentaos en círculu, coles piernes estiraes haza alantre, al rodiu la madre. La madre nel centru va diciendo, señalando los pies de los del corru:
La gallina popozada punxo güevos nuna añada, punxo uno, dos tres, cuatro, cinco, seis, siete, ocho. ¡Guarda nenu’l bizcochu! (entós a quien señale’l zapatu tien que guardalu p’atrás)
Repítese fasta que toos tienen los pies escondíos. Entós faese esti diálogu ente la madre y dalgún del garrapiellu:
_ Criáu, ¿qué hora ye?
_ La una
_ Dormiremos un poquiñín
_ ¿Ónde tán les pites?
_ Les dos van pel ríu abaxo
_¿Y el gallu?
_En pozón
_Vamos cebar los pitinos (Al dicir esto, tolos rapazos espurren les piernes pal centru y les mueven pa los llaos, semeyando pitinos)
XUEGOS D’ANIMALES
Un xugador fai de madre y el restu ponse en frente en llínia mirando pa ella. La madre diz un animal y el númberu de pasos que tienen que dar los xugadores (por exemplu: tres pasos de xigante, dos de canguru, cinco de formiga...). Gana’l que llega primero a la madre, pasando a tener esti nuevu papel.
Cuando los xugadores yá tán cerca la madre, ésta dirá nomes d’animales más pequeños p’allargar el xuegu
<-Dir al entamu->
¿Cuál ye'l colmu d'un astronauta?
Nun tener espaciu
¿Cuál ye'l colmu d'un llibru?
Cuando llegue la seronda pierda les fueyes
¿Cuál ye'l colmu d'un osu panda?
Que-y faigan una semeya en color y salga en blancu y negru.
¿Cuál ye'l colmu d'un matemáticu?
Plantar un árbol y que tenga la raiz cuadrada
¿Cuál ye'l colmu d'un pastor?
Que se duerma cuntando oveyes
¿Cuál ye'l colmu d'un futbolista?
Tener un fíu pelota
¿Cuál ye'l colmu d'un motorista?
Sacar la mano pa ver si llueve
¿Cuál ye'l colmu d'un mélicu?
Que la so muyer se llame Dolores
¿Qué-y dixo l'azucre a la cuchara?
Vémonos nel café
¿Qué-y dixo'l númberu 0 al 8?
Préstame asgaya'l to cinturón
¿Qué-y dixo la cerilla a la caxa?
Por ti pierdo la cabeza
¿Qué-y dixo la lluna al sol?
Paez mentira, tan grande y nun te dexen salir de nueche
¿Qué-y dixo un árbol a otru?
Dexáronnos plantaos
¿Qué-y dixo'l cuadru a la parede?
Dexáronme colgáu
¿Qué-y dixo una ñalga a otra?
Ente tú y yo hai muncha mierda
¿Qué-y dixo una parede a otra?
Vémonos na esquina
¿Qué-y dixo l'azucre a la lleche?
Cuando toi contigo derrítome
¿Qué-y dixo una pulga a otra?
¿Colamos caminando o esperamos al perru?
¿Qué-y dixo un calvu a otru calvu?
¡Cuánto tiempu ensin venos el pelo!
Un neñu que taba mirando un álbum de fotos entrúga-y a la ma:
_ ¿Quién ye’l xoven tan guapu que ta al to llau nesta semeya?
_ ¡Ai fiyín!. Esta semeya yá tien venti años, y el xoven tan guapu ye’l to pá
_ ¿Mio pá?. Pero entós, ¿quién ye’l paisanu vieyu y calvu que vive con nós?
La maestra entrúga-y a Xurde:
-¿Sabes dicime dos pronomes?
-¿Quién, yo?
- Mui bien
Nuna zapatería:
-¿Tien zapatos del 35?
-Non, d’enantes de la Guerra nun tenemos ná
Una formiga y un elefante alcuéntrense nun ascensor
- ¿Cuántos años tienes?. Entruga la formiga
- Yo tres, ¿y tú?
- Tamién tres, pero ye que tuve mui malina
¿Cuál ye la diferencia ente una pulga y un elefante?
Que l’elefante pue tener pulgues y la pulga nun pue tener elefantes
Antonio alcuentra al so amigu con un tarru mermelada
- ¿De quién ye esa mermelada? Entruga Antonio
- La mitá del mio hermanu y la otrá mitá de mio
- ¿Dasme un poquirritín de lo tuyo?
- Nun pueo, lo mío ye lo que ta no fonderu del tarru
Un borrachu llama per teléfonu:
- ¿Pue dicime ónde ta’l doctor Ramirez?
- Nun conozo nengún doctor Ramirez
- Ye que’l doctor Ramirez soi yo, pero nun sé ónde toi
Una pita entra nel xardín d’un home mui atuñáu
- Podemos matala pa xintala, diz la muyer.
- Non, déxala fasta mañana qu’entovía pue poner un güevu
Nuna estación de tren, Pedro entrúga-y a Lluís:
- Si aquel tren fora de chocolate, ¿per ónde entamaríes a xintalu?
- Peles ruedes
- Lluís contesta-y aína: bien, asina nun fuxiría
La ma d’un neñu díci-y al maestru:
- Xuan nun quier llevar los gochos a pastiar
El maestru ablucáu entrúga-y:
- ¿Y por qué me diz a mi eso?
- Porque vusté dixo na clas: "Dime con quién andes y te diré quién yes"
<-Dir al entamu->
