Llibru estrella

Ver llibru anterior

AMARRAZA NES DÓMINES DE PELAYO

Viaxar nel tiempu ye ún de los suaños de la humanidá. Caleyar pel futuru o dar una vueltiquina pol pasáu nun tienen visos de facese realidá a curtiu plazu por más que los científicos escargaten na teoría xeneral de la rellatividá y na contraición conxunta del espaciu y del tiempu.

Los primeros albidros nun foron mui prometedores pola coruxía que daben los cloyos negros. ¿Y si la máquina del tiempu allanca nuna rexón del espaciu-tiempu de la que nada, nin tan siquier la lluz ye quien a escapar, por aciu de la enorme fuerza de la so gravedá?. Menos mal que'l maxín de Stephen Hawking dio colos furacos de merucu: una triba de tubín perflacu d'espaciu-tiempu que xunce rexones alloñaes del universu. Estos furacos de merucu podríen rellacionar universos paralelos y hasta proporcionar la posibilidá de movese nel tiempu: diendo per ún d'ellos sales pela mañana, éches-y una güeyada al otru llau de la galaxa y tas de vuelta pa cenar.

¿Y la máquina? ¿Tenemos yá teunoloxía afayadizo pa entamar l'aventura? Pues nós sí. Porque Asturies, qu'entró na carrera espacial nel añu 1993 de la mano d'Adolfo Camilo (Prímula I: Blugás; Trabe, Uviéu), tien la suerte de ser la patria del científicu Francisco Fontes, el primeru n'algamar con una solución cenciella y elegante, como correspuende a toles grandes idees científiques: les ondes T.

Gracies al descubrimientu del profesor Fontes, Licia, Rafa y Mario, participen n'amarraza de Cuadonga, nel 721, nin más nin menos. Y pa que nadie nun s'escaeza de les sos andances, cuéntales con pricuru Xulio Arbesú nuna obra que mereció'l premiu "Llectures pa rapazos 2001", convocáu pola Academia de la Llingua Asturiana. La edición sal enguapiada coles ilustraciones d'Alberto Álvarez Peña, na llinia de lo que yá fixere pa Fontenebrosa: el reinu de los Silentes, de García Oliva (Trabe, Uviéu, 1992).

¿Atréveste a embarcate na aventura de lleer la novela más llarga de la lliteratura xuvenil n'asturianu? Esti desafíu pa llectores valientes tien premiu aseguráu: disfrutar d'una ficción histórica qu'encartia a quien vive n'Asturies y asistir al nacimientu d'un narrador nuevu que trai idees orixinales, amás de dominar los resortes de la narración: el puxu de los personaxes, el tonu y la tensión son de lo más afayadizo. Nun tienes disculpa nenguna pa nun salir a dar una vuelta pel tiempu y sentir l'aire fresco de la Historia.