Ficha didáutica

Ver ficha anterior

TÍTULU DEL LLIBRU: El Tatuaxe Autora Mª Esther García López EDITORIAL: Editora del Norte APLICACIÓN DIDÁUTICA: Pa escolinos de 6u de Primaria

LLECTURA 2. El Diariu de Selina

OXETIVOS:

• Familiarizase colos personaxes del llibru.
• Reparar na estructura de testos narrativos: el diariu
• Reconocer y producir testos descriptivos (el retratu y l'autorretratu) y narrativos (el diariu)
• Prauticar la espresión oral
• Concienciase de la importancia de comunicase colos sos pas
• · Sensibilizase con temes de conocencia y respetu a otres cultures
• · Reflexonar sobre aspeutos gramaticales ya ortográficos: l'apóstrofu, les contraiciones y los nomes propios

ACTIVIDAES:

ACTIVIDAES ANTICIPADORES DE LA LLECTURA:

El títulu d'esta llectura ye "El diariu de Selina" ¿De qué te paez que pue tratar la llectura según el títulu?

• Escribi otru títulu que te paeza afayadizu pa ponéi a esti rellatu:

………………………………………………………………………………………………………………………………………………………………

• Describi los personaxes que ves nos dibuxos. ¿Prestaríate aldovinar de que va la llectura enantes de lleela? En grupos de cuatro, xugái a inventar qué pondría Selina nel diariu, sabiendo lo que-y pasó l'otru día na clas. (Repasa la llectura I, " La Despidida d'Ahmed").

TESTOS NARRATIVOS: el diariu

El diariu ye un testu narrativu, escritu en primera persona, nel que se cuenta día a día les coses que -y pasen al so autor. Ye un documentu íntimu, nel que l'autor espeya, sinceramente, los sos sentimientos y los sos enfotos.

• Llee con procuru "El diariu de Selina". Escribi tú'l to diariu. Escueye una xornada que seya pa ti importante. Nun t'escaezas de poner la fecha.

TESTOS DESCRIPTIVOS: El retratu y l'autorretratu

• Llee despacín la llectura que te proponemos. Equí faise un retratu de Selina, un retratu físicu y un retratu de carácter. Copia en dos columnes los rasgos físicos que describen a Selina y n'otra los rasgos de carácter.

Tu tamién pues describir como yes, los tos rasgos físicos y los tos rasgos de carácter. Escribi equí'l to autorretratu :

Tu yes amigu/a de Selina. Pega equí una semeya onde tu y Seli tais xugando. Pues utilizar paisaxes recortando semeyes d'una revista y pégales pa facer una composición prestosa (collaxe). Dempués escribi un pie de foto. Pegái nel tableru toles semeyes que compuxistis

LLugar y Fecha

VOCABULARIU:

• Selina ye una neña mal comedora, nun-y presta un res el pescáu nin otres coses que deben comer tolos neños y xóvenes pa medrar ya tar bien allimentaos.

Xuntáivos en grupos de cuatro y aldericái sobre les comides que más vos gusten y les que menos vos gusten. Ún fai de secretariu y anota nuna fueya les comides más gustoses y n'otra les que naide quier y llueu facéis un gran alderique na clas sobre "La importancia de comer bien pa medrar sanu"

CREENCIES POPULARES Y TRADICIONES

N'Asturies, tamién tenemos oxetos máxicos asemeyaos al talismán qu'Ahmed-y traxo a Selina, pero utilícense pa otres coses. Por exemplu la cigua, que ye un oxetu en forma de mano zarrada al que se-y atribuyen poderes y que se creye que defende del agüeyamientu a la persona que lu lleva puestu. ¿Conoces dalgún más? Infórmate sobre la piedra la culiebra y otros.

· Deprende refranes y dichos rellacionaos cola comida:

"El payeiru, ensin paya, nun se fai".
" A falta de pan bonas son tortas".
"Ser un fartón"

ACTIVIDAES DE REFLEXÓN GRAMATICAL:
L'apóstrofu

· Escribi equí ún de los párrafos de la llectura nel qu'apaezan, polo menos, cuatro pallabres con apóstrofu. Píntales con un sorrayador. Esplíca-y al to collaciu por qué van apostrofaes les pallabres señalaes. Por exemplu:

"Rubén ya s'encargó d'espardelo".

El pronome se apostrófase cuando-y sigue una pallabra qu'entama por vocal o h muda.

La preposición de apostrófase cuando -y sigue una pallabra qu'entama por vocal o h muda.

Les contraiciones:

Vamos a facer un floreru de contraiciones. Tienes de buscales nel xardín del testu:

Pues ponéi toles flores-contraición que te pete.

Ortografía:

Los nomes propios escríbense con mayúscula.

· Busca nel testu tolos nomes de persona y escríbilos equí por orde alfabéticu.

…………………………………………………………………………..

…………………………………………………………………………..

…………………………………………………………………………..

…………………………………………………………………………..

DIFUSIÓN DEL TRABAYU:

• Colgái en dixebraos requexos de la clas, los trabayos realizaos.
• Facéi un álbum de fotos xuntando toles que compuxístis.

Nota: Alcuérdate de repasar, correxir y refacer les tos producciones escrites.

Mª Esther García López

uov00564@correo.uniovi.es