Entrevista

Ver entrevista anterior

Entrevista fecha a Xosé María García (Llábana), maestru del colexu públicu Jacinto Benavente y coordinador de toponimia de l'asociación "El Carbayu"

1. Nel añu 1984 entama la enseñanza del asturiau en seis centros (Evaristo Valle, Sta. Marina, Reconquista, Fdez. Carbayeda, El Parque y Obanca). ¿Cómo fueron estos primeros comienzos?.

Esta esperiencia, la primera na historia d'Asturies, entama nel mes d'ochobre con una crítica social dura, ensin embargu, la escolarización foi d'un 80 % en tolos centros cola esceición d'Evaristo Valle que foi d'un 35% anque en tres años alcanzó'l mesmu porcentaxe que los anteriores. Los nenos teníen dos hores de clas a la selmana y los materiales que s'emplegaben yeren llibros de testu como Reciella o Al riscar, fiches de trabayu que facíemos los maestros y que llueu pasábemos d'unos a otros, cuentos de la coleició n escolín de l'Academia... Cuando finaron los seis años d'esta esperiencia fízose una evaluación del proyeutu. Amás de deprender la llingua, los nenos taben más sensibilizaos colos problemes sociales d'Asturies. Pero entovía nun sé lo que se fizo con esta evaluación qu'enxamás foi espublizada.

2. Dempués de dieciocho años, ¿cuál ye la situación del asturianu na escuela?

La xeneralización de la enseñanza en Primaria foi un pequeñu avance, ensin embargu, n'infantil nun esiste, y ye fundamental porque un nenu pue dicir pa o ma na so casa, pero llueu llega a la escuela y diz papá y mamá, nesti sen, hai una medida represora tremenda.Y si falamos de la enseñanza secundaria ye como si nun esistiera, la situación ye mui mala.

3. Munchos pas piensen que deprender asturianu ye perder el tiempu porque nun ye una llingua útil, siendo más importante inglés o francés. ¿Qué-yos diría a estos pas?

A los pas nun-yos diría nada, ye a l'Alministración a la que-y diría que l'asturianu nun tien que competir con otres llingues. El nenu o'l rapaz tien que tener derechu a deprender l'idioma foriatu amás del asturianu y tien que ser na opción de cultura asturiana como pasa en Primaria.

4. La Unesco considera qu'una llingua d'una comunidá ta en pelligru de desaniciu cuando un 30 % de los nenos nun la deprenden. ¿Ta la nuesa llingua amenaza de muerte?

Si nun hai oficialidá la llingua muerre. Tien que tar presente en toles estayes sociales.Nos medios de comunicación. Na toponimia,enderechando los cartelos. Na Alministración, tolos funcionarios deberían saber falar y escribir correutamente dempués de pasar la prueba de conocencia.Pero yá se sabe que lo que nun val económicamente arrímenlu pa un l lau.

5. Va poco la Xunta Xeneral del Principáu fizo unes sesiones consultives sobre la llei de medios de comunicación social que regulará la televisión autonómica. ¿Cómo debería ser esta televisión: con un 50% de programación y la posibilidá d'un sistema dual como diz l'ALLA o un 100% de la programación n'asturianu como diz la Xunta Pola Defensa de la Llingua avalada por 20.000 firmes?

Debería ser al 100% con dibuxos animaos pa los nenos y una programación amplia onde l'asturianu tea funcionando permanentemente

6. Como coordinador de la de la Xunta de toponimia de l'asociación de vecinos El Carbayu de Caldones, ¿cuál y l'actitú del Ayuntamientu de Xixón con respeutu a esti tema?

Nun se respeta nin la llei d'Usu y Promoción del Asturianu nin l'alcuerdu col Ayuntamientu que se comprometió a colocar los nomes tradicionales. En Caldones ta too en c astellán menos La Llomba. Toos estos problemes de los que falé hasta agora tieren arreglu col respaldu de la oficialidá.

Estremaes visiones de la necesidá del asturianu na TV

13/11/2002 La Xunta Xeneral del Principáu ta faciendo estos díes unes sesiones consultives nes que se convida a estremaes entidaes y organizaciones representatives de la sociedá asturiana pa que dean el sopaecer sobre la llei de medios de comunicación social del Principáu, que regulará la famosa televisión autonómica qu'empobina'l gabinete Areces.
Dientro d'estes comparecencies ayeri toco-yos el turnu pa falar na Xunta Xeneral a toles entidaes rellacionaes col asturianu. Academia de la Llingua Asturiana, Xunta Pola Defensa de la Llingua Asturiana, Periodistes pol Asturianu y otres entidaes comprometíes col tema como'l Conseyu de la Mocedá d'Asturies tuvieron el so turnu nestes sesiones consultives.

Si bien toles entidaes tuvieron d'alcuerdu en que l'asturianu precisa de tener una presencia digna na futura tv asturiana, lo cierto ye que nel modelu a aplicar pa que se dea esta normalización televisiva hebo postures bien distintes.

D'una parte, Quique Faes, de l'Asociación Periodistes pol Asturianu, centró la so intervención en pidir que la televisión nun seya un instrumentu al serviciu de los políticos, faciendo referencia de la qu'acababa a la necesidá de dar una presencia digna a la llingua asturianu, pal que pidió que se punxere un sistema dual (que l'espectador pueda escoyer en que llingua quier ver la programación).

Amás de Faes, los periodistes Próspero Morán y Xurde Morán tamién falaron énte la Xunta. El primeru vieno a sofitar la postura de Periodistes pol Asturianu, concuellando cola idea de poner el dual, mientres que la ponencia del célebre documentalista de la TV de Xixón y locutor de la Cadena Ser nun punxo oxetivos concretos pa la presencia del idioma pero dixo que l'asturianu tien un gran potencial por esplotar nos medios y tamién que con mui pocos medios podíen facese munchu llabor nesti sentíu.

La presidenta de l'Academia de la Llingua Ana Cano presentó una ponencia (que pues consultar entera calcando equí) na que pidió'l 50% de programación n'asturianu, como yá venía diciendo l'Alla dende va tiempu, y tamién la posibilidá d'un sistema dual pal restu de la programación. La ponencia académica cuidose d'entrar en más fondures, y Ana Cano yá entamó diciendo que l'Academia nun ye quien pa definir como tien de ser la programación de la TV nin tampoco en qu'horarios preferenciales nin que clase de programes tendríen de facese n'asturianu.

Pola asociación cívica Xunta Pola Defensa de la Llingua Asturiana faló Iván Huerga (ver testu enteru de la ponencia), quien espuso lo que la Xunta vien defendiendo dende qu'entamó'l debate sobre la Tv asturiana, que nun ye otro que'l 100% de programación n'Asturianu, una petición que la Xunta presentó avalada poles 20.000 firmes que pañó la Xunta en sofitu a esta propuesta. Pa la xunta, énte la saturación de medios en castellano, namás una tv n'asturianu podría atayar el procesu de desaniciu del idioma. Amás del 100% d'emisión, la Xunta pisdió que pa que la normalizaciónseyan reales fai falta que la tv dea conteníos xeneralistes. No que ye'l proyectu de llei propiamente dichu, la Xunta pidió que se recoyere ente les competencies del Conseyu d'Alministración velar esplicitamente y planificar la presencia del asturianu nel Ente, y que nel Conseyu de Comunicación tea presente l'Academia de la Llingua Asturiana. Como casu col que comparase, Huerga presentó el de Gales, onde la decisión política de poner una TV en galés dafechu valió pa salvar l'idioma, que daquella taba dando les boquiaes.

La ponencia del representante Conseyu de la Mocedá del Principáu d'Asturies vieno a afondar na argumentación espuesta pola Xunta, piiendo tamién l'organismu que representa a la mocedá del país una tv 100% n'asturianu.

Mª del Mar Martín
alagueta@telecable.es