UNA celebra la sentencia del canon y pide que s’estienda a particulares

Unidá Nacionalista Asturiana calificó de “primer pasu” la sentencia del TSXE sobre’l canon dixital. Sicasí, los nacionalistes opinen que’l procesu tien de dir “más allá”, incluyendo a los usuarios particulares.

El coordinador d’UNA, Miguel Ánxel Díez, tresmitió la satisfacción “moderada” d’UNA sobre la sentencia del del Tribunal de Xusticia de la Xunión Europea, que declara illegal el canon sobre copia privada pa empreses y profesionales.

“Toos y toes, menos el gobiernu Zapatero, persabíamos que yera un abusu cobrar un canon por copiar datos propios a empreses y profesionales”, señaló Díez, que sorrayó qu’agora debería d’entamase un procesu de negociación ente autores y el mundu de les nueves tecnoloxíes pa garantizar “los derechos de los primeros ensin poner dificultaes al desendolque de los segundos y ensin criminalizar a los usuarios particulares”.

El coordinador d’UNA tamién opinó que la sentencia tien que dir “más allá”, y incluir amás a los usuarios particulares porque, pa los nacionalistes, el canon dixital "aseméyase más a una multa preventiva por realizar un fechu que la so realización ye puramente hipotética, qu'a una tasa pa protexer los derechos d'autor”.

Política “errática”
A lo último, Miguel Ánxel Díez llamó a que’l gobiernu español suprima’l “canon en tolos casos” pa evitar nueves sentencies que, según él, dexen n’evidencia “n'evidencia la errática política del gobiernu central en tolo que cinca al mundu de la comunicación ya internet”.