Marisa Valle Roso va poner el ramu a la xira ‘Consciente’ n’Avilés

|
Yolanda Alonso y Marisa Valle Roso conciertu fin de xira 'Consciente'

El 15 de febreru ye la fecha escoyida por Marisa Valle Roso pa poner fin a la xira ‘Consciente’, que la llevó a escenarios de tol Estáu nos dos años últimos. El 4 de payares van salir a la venta les entraes pa una cita especial nel avilesín Teatru Palacio Valdés na que l'artista llangreana va tar acompañada de dellos convidaos.

Toledo y Fuenlabrada son les ciudaes que van poder disfrutar próximamente del repertoriu preparáu por Valle Roso a partir del discu de mesmu nome, ‘Consciente’, asoleyáu a últimos del 2017. ‘La Planta 14’, ‘Arriba quemando el sol’, ‘Macorina’, ‘Lela’ o ‘Drume negrita’, temes bien conocíos pol públicu que la cantante fai propios, suenen nes sos actuaciones, amás d’otres composiciones propies, y van sentise nel Palacio Valdés dientro de la programación especial conmemorativa del centenariu d’esta instalación.

La cita presentóse esta mañana nel Conceyu d’Avilés nun actu nel que tuvo presente l’artista, acompañada pola conceyala de Cultura, Yolanda Alonso, y nel qu’anunció que'l conciertu diba ser una cita especial con delles collaboraciones que va dar a conocer nes selmanes próximes. Les entraes van ponese a al venta’l 4 de payares y el comienzu de l’actuación va ser a les 20 hores.

Na semeya, Alonso y Valle Roso.

Contador Estadistiques