Asturies va acoyer nel 2020 la xunta añal de la Plataforma de Rexones de Carbón en Transición

|
Firmantes de la 'Declaración de Görlitz'

La Comisión Europea escoyó esti llunes a Asturies como sede de la xunta añal de la Plataforma de Rexones de Carbón en Transición del 2020, asocediendo a la población silesia de Görlitz. Nella participen dende’l 2017 41 territorios mineros de tola Xunión Europea.

El direutor axuntu de la Direición Xeneral d'Enerxía de la Comisión Europea, Klaus-Dieter Borchardt, anunció ayeri la escoyeta d’Asturies mientres la llectura de les conclusiones de la xunta d’esti añu. La decisión atiende a la ufierta fecha n'ochobre pol conseyeru d'Industria, Emplegu y Promoción Económica, Enrique Fernández, mientres un alcuentru de trabayu en Bruxeles, que foi repitíu va unos díes mientres una visita de miembros del organismu européu a Asturies.

La Plataforma de Rexones de Carbón en Transición ye una iniciativa constituyida n'avientu del 2017 pola Comisión Europea. El so oxetivu ye promover mecanismos de sofitu a los territorios mineros más afeutaos pol procesu de transición escontra una economía baxa en carbonu, sobre manera pol zarru de la minería.

Anguaño integra a 41 territorios. Amás d’Asturies, que participó en toles sesiones de trabayu, ente la representación estatal de la Plataforma tán Castilla y Lleón, Castilla-La Mancha y Aragón, amás del Ministeriu de Transición Ecolóxica, l’Institutu pa la Reestructuración de la Minería del Carbón (IRMC), l’Asociación de Comarcas Mineras (ACOM), HUNOSA y los sindicatos SOMA-FITAG-UXT y CC OO.

Robla de la ‘Declaración de Görlitz’

Asturies robló xunto con otros trece territorios carboneros, la nomada ‘Declaración de Görlitz’, un documentu nel que se reclama a la Comisión Europea midíes específiques nueves de sofitu pa la reactivación económica de llugares que sufrieron el zarru de mines de carbón nos dos años últimos. Aragón, Castilla y Lleón tán ente les firmantes xunto con rexones d'Alemaña, Polonia y la República Checa.

Contador Estadistiques