Asturies lidera xunto con Aragón la baxada del paru en febreru al rexistrar 903 desemplegaos menos

|
Nivel paru construcción

Febreru foi positivu no que respeuta a la evolución del desemplegu n’Asturies al baxar el paru y aumentar l’afiliación a la Seguridá Social, que rexistra la mayor cantidá, 368.664, pa esti mes nos 12 años últimos. Si en xineru’l país lideró l’aumentu del númberu de demandantes, nesta ocasión rexistra les meyores cifres depués de Melilla y Aragón.

La construcción, la industria y los servicios foron los sectores que puxaron por esta baxada de 903 persones na llista del paru. En concreto menguaron un 3,35, un 2,79 y un 1,63 por cientu, de manera respeutiva.

Asina, en febreru la cayida del desemplegu foi del 1,41 por cientu cuando nel conxuntu del Estáu medró un 0,09 por cientu, esto ye en 2.618 persones que ponen el total 2.911.015 persones, según los datos daos a conocer pol Ministeriu de Trabayu y Economía Social. Melilla (4,53) y Aragón (2,13) son les úniques con meyores cifres qu’Asturies, a la que-y sigue Castilla y Lleón con un 1,23 por cientu, mentes que les autonomíes con mayor aumentu son Murcia (1,72), la Comunidad de Madrid (1,63) y Ceuta (1,61).

A nivel interañal el descensu nel país, un 4,33 por cientu (2.863 desemplegaos menos), foi más pequeñu que la media estatal, del 6,45 por cientu (200.669). Lidera esta baxada un mes más Illes Balears (32,69), con Estremaúra (9,80) y Canarias (7,78) les siguientes na llista; namái aumenta’l paru en comparanza col febreru pasáu en Melilla, un 12,24 por cientu.

Dende’l 2011

L’afiliación a la Seguridá Social asítiase en 368.664 persones n’Asturies, el meyor datu pa un mes de febreru dende’l 2011, según los datos espublizaos esta mañana pol Ministeriu d’Inclusión, Seguridá Social y Migraciones. El númberu de cotizantes creció en 550 en comparanza col mes anterior (0,15 por cientu) y en 1.036 con febreru del 2022 (0,28 por cientu).

El datu que baxó foi’l de la contratación, un 9,59 por cientu, al pasar de los 17.169 de xineru a los 15.522 d’esti mes pasáu. D’ellos 5.646 (34,78 por cientu) foron indefiníos.

AdxuntuTamañu
PDF icon Datos del paru febreru 2023874.1 KB
Contador Estadistiques