Asturies rexistra’l mayor aumentu del paru nel Estáu en xineru

|
Paru percha tienda servicios

La inscripción de trabayadores del sector servicios como demandantes d’emplegu llueu de la campaña de Navidá provocó un aumentu de 2.342 paraos n’Asturies en xineru, un porcentaxe del 3,78 por cientu que supón el mayor del Estáu. Sicasí, el total de 64.229 desemplegaos supón la cifra más baxa pa esti mes dende’l 2008.

A nivel estatal la medra ye del 2,49 por cientu al rexistrar 70.744 paraos más pa llegar a los 2.908.397. Llueu d’Asturies lideren esta xubida la Comunidad de Madrid (3,74 por cientu), Cantabria (3,40) y Castilla-La Mancha (3,26), mentes qu’Illes Balears ye l’únicu territoriu onde baxa, un 0,83 por cientu.

Nueve de cada diez paraos nuevos n’Asturies proceden del sector servicios, mentes que de la industria foi’l 1,89 por cientu del total, l’agricultura y pesca’l 0,61 y la construcción el 0,15. El Serviciu Públicu d’Emplegu del Principáu d’Asturies (SEPEPA) rescampla que l’aumentu en xineru términos absolutos ye’l menor dende’l 2021 sacante l’añu pasáu, cuando foi de 1.491 persones.

Dende’l Gobiernu tamién quieren poner el focu nel descensu interañal pola acumulación de 22 meses de baxada siguíes. El descensu, sicasí, sigue lloñe del estatal: un 3,11 por cientu (2.060 paraos menos) y 6,87 (214.681), de manera respeutiva.

Illes Balears encabeza un mes más esta llista, con un 34,69 por cientu, na que-y siguen la Comunidad de Madrid (13,21 por cientu) y Estremaúra (10,92). Melilla, por contra, torna a rexistrar un aumentu interñal, siendo nesta ocasión la única, que s’asitia nel 15,99 por cientu.

Baxa la contratación y l’afiliación a la Seguridá Social

En xineru rexistráronse n’Asturies 17.169 contratos polos 19.014 del mes anterior, de los que 5.728 (33,36 por cientu) foron indefiníos y 11.411 temporales. No que respeuta a l’afiliación a la Seguridá Social, Asturias asitióse en 368.115, el meyor datu pa esti mes dende’l 2011, anque supón una baxada dende avientu, cuando la cifra total taba en 372.497.

AdxuntuTamañu
PDF icon Datos del paru xineru 20231.47 MB
Contador Estadistiques