El paru desciende n'Asturies en marzu per segundu mes siguíu

La baxada, un 2,57 por cientu con 1.630 desemplegaos menos, torna a ser superior a la media estatal, que queda nel 1,67 por cientu.

Asturies torna a rexistrar nesti mes últimu una bona evolución en tema d'emplegu: baxa'l paru y aumenta l'afiliación a la Seguridá Social. Ye'l segundu mes siguíu nel que desciende'l desemplegu.

En total rexistráronse 1.630 demandantes de trabayu menos qu'en febreru pa dexar el total en 61.696, mentes que nel Estáu la cifra foi de 48.775 pa quedar en 2.862.260. Lidera la baxada Illes Balears, un 4,17 por cientu, siguida de Melilla (3,89 por cientu) y Cantabria (3,88), mentes que namái aumenta'l paru en Ceuta (1,94) y na Comunidad de Madrid (0,32).

N'Asturies la mengua del desemplegu benefició a los dos sexos, a tolos rangos d'edá y a tolos sectores; la única esceición foi'l coleutivu ensin trabayu anterior. Rescampla la bona evolución del sector primariu y de la industria, con cayíes del 3,72 y el 3,67 por cientu, de manera respeutiva, superiores a la media.

A nivel interañal, el país cuenta con 4.341 paraos menos, un 6,57 por cientu, dalgo menor que la media estatal, que s'asitió nel 7,93 por cientu al baxar en 246.503 los demandantes d'emplegu. Lidera tamién el descensu Illes Balears (31,84 por cientu), con Estremaúra (11,44) y Andalucía (9,54) siguientes nuna llista que zarra Melilla, únicu territoriu onde aumentó d'un marzu a otru, un 5,32 por cientu.

Aumentó la contratación

L'afiliación a la Seguridá Social aumentó en 3.900 persones (1,60 por cientu), hasta les 372.565. En términos porcentuales ye'l mayor incrementu dende'l 1999, apuntó'l Serviciu Públicu d'Emplegu del Principáu d'Asturies (SEPEPA).

En marzu rexistráronse 19.797 contratos, de los que 7.569 (el 38 por cientu) foron de calter indefiníu. En febreru el total de compromisos llaborales firmaos quedó en 15.522.