La incidencia acumulada a 14 díes baxa per primer vez dende'l 26 de xunu

|
Gráficu vacunación pauta completa

Asturies ye'l primer territoriu n'algamar l'oxetivu del 70 por cientu de vacunaos. El xueves rexistráronse 411 casos nuevos.

Dende'l 26 de xunu, cuando la incidencia acumulada a 14 díes baxabada de 75,29 casos cada 100.000 habitantes a 74,21, esti índice nun aparó de xubir hasta'l miércoles. Un ascensu esplosivu que se frenó depués de llegar el martes al tope de la pandemia, 685,23 casos, y baxar darréu a 675,41 –ayeri tornó a descender, hasta 658,33–.

Yá anunciaran na rueda de prensa d'ayeri les autoridaes sanitaries un ameyoramientu tanto nos datos a 14 como a 7 díes, cola posibilidá de tar yá nel picu de la cuarta fola de siguir la tendencia. De momento, Salú detectó ayeri 411 casos nuevos de COVID-19 –l'actualización auméntalos a 443 por contaxos non contabilizaos en díes anteriores–, 27 más que'l miércoles, anque una cantidá menor a la del martes.

Fixéronse 4.014 pruebes de diagnósticu d'infeición activa, polo que la tasa de positividá s'asitió el 12,95 por cientu, asemeyada a la de la xornada anterior, con un 12,99 al realizase 3.977. A 7 díes esti porcentaxe yera enantes d l'actualización del 14,34 por cientu –ayeri baxó al 14,11 por cientu–.

Un home de 81 años finó cola enfermedá causada pol coronavirus SARS-CoV-2, la muerte númberu 1.989 del andanciu. Hai 138 pacientes hospitalizaos con confirmación o sospecha de COVID-19, 20 más que'l miércoles, a los qu'hai que sumar 20 que tán na UCI, 2 menos.

La ocupación total nos hospitales ye del 4,76 por cientu en planta y del 6,71 por cientu na UCI, mui cerca de les cifres que llevaríen a entrar a nivel de riesgu mediu y activar la cuenta atrás en dellos conceyos pa entrar en nivel d'alerta 4+.

Inmunidá de rebañu

La campaña de vacunación avanza a velocidá de cruceru n'Asturies, primer territoriu n'algamar el 70 por cientu que se marcaba dende'l Gobiernu estatal como oxetivu pal branu y que dalgunos espertos asitien como'l porcentaxe a partir del que se consiguen la nomada inmunidá de rebañu. En concreto, 655.373 persones, un 70,17 por cientu de la población diana, los mayores de 12 años, tien la pauta completa (un 64,33 por cientu del total del país), mentes que 730.456, un 78,20 por cientu (71,70) recibió una dosis.

Contador Estadistiques