Ocho de los diez concursos qu’entama l’Academia de la Llingua Asturiana (ALLA) yá abrieron el plazu la recoyida de trabayos. Son los que componen el Certame d’Investigación, mentes que los dos de la Olimpiada Escolar Urbano Rodríguez, el de Primaria y el de Secundaria y Bachilleratu, van entamar coles inscripciones nel mes d'ochobre.

Ensin concretar plazos porque “queremos que sía de consensu”, pero cola intención de facelo “cuanto antes porque realmente consideramos que ye importante y urxente”, la Viceconseyería de Cultura, Política y Deporte va presentar un Plan de Normalización Llingüística esta llexislatura. Ana Vanesa Gutiérrez apuntó que’l trámite va ser paralelu al d’actualización y desendolcu de la Llei d’Usu y Promoción.

Dieciocho artículos de Marta Mori conformen ‘Notes de lliteratura asturiana’ (Trabe), llibru na que la crítica lliteraria axunta estudios y reseñes pa dar al llector una visión de les nueses lletres y les sos problemátiques dende’l sieglu XVII hasta anguaño. La obra presentóse en Xixón, en La Buena Letra, con un alderique con Rafael Rodríguez Valdés sobre dalgunes cuestiones que se toquen nel volume.

‘Nel cantu la memoria. Ensayu sobro l’asturianada tradicional’ ye’l trabayu merecedor del XXIX Premiu Máximo Fuertes Acevedo d’ensayu. El so autor ye Héctor Braga, músicu y intérprete que yá afondara nesti tema na so tesis doctoral, con sobresaliente cum laude, y n’otros artículos d’investigación en revistes especialidaes.