El paru torna a baxar n'Asturies en marzu

El sector servicios, por mor de la campaña de Selmana Santa, lidera'l descensu.

Segundu mes siguíu de baxada del desemplegu n'Asturies. El país rexistró 1.276 paraos menos pa dexar el total en 57.559, la cifra más baxa pa marzu dende'l 2008.

Supón una mengua del 2,17 por cientu, perriba de la media estatal, del 1,21 por cientu al contar con 33.405 demandantes menos pa quedar en 2.727.003. Los meyores datos son los d'Illes Balears, con un 3,52 por cientu, siguíu de Canarias (2,76) y Castilla y Lleón (2,27), quedando como úniques autonomíes con aumentu del paru Euskadi (0,84), Melilla (0,55) y la Comunidad de Madrid (0,22).  

La disminución del desemplegu'l mes pasáu n'Asturies foi xeneralizada: benefició a entrambos sexos, a toles franxes d'edá y a tolos sectores económicos. Por sectores, los servicios concentraron el 85 por cientu de la reducción, impulsada pola campaña de Semana Santa, mentes que la industria baxo un 3 por cientu con repeuto a febreru.

En comparanza col añu pasáu rexistráronse 4.137 menos, una baxada del 6,71 por cientu, tamién superior a la media estatal, del 4,73 por cientu al contar con 135.257 desemplegaos menos. Asturies acumula asina 36 meses siguíes de descensu, rescamplando nesti casu la buena evolución de los servicios, que concentra el 70 por cientu de la reducción del paru y, en términos relativos, la industria, con una disminución del 9,61 por cientu y del sector primariu, del 9,53.

La llista de marzu lidéranla tamién Illes Balears (12,06) y Canarias (10), mentes que Melilla (7,11) y Euskadi (2,09) son les úniques que ven aumentar el paru nesti datu.

Cifra más alta de cotizantes dende'l 2010

L'afiliación a la Seguridá Social aumentó en 3.286 persones, hasta algamar los 379.685 cotizantes, la cifra más alta dende'l 2010 pa un mes de marzu. En companza col mesmo periodu del 2023, hai 7.120 afiliaos más, lo que representa un incremento del 1,91 por cientu.

Otra manera, en marzu firmáronse 17.458 contratos polos 17.195 del mes anterior, cuando se produxera una cayida de la contratación. Sicasí, supón un descensu del 11,8 por cientu con respeuto al memu mes del 2023, esto ye, 2.339.

Na imaxe, gráfica del Sociedá Asturiana d'Estudios Económicos y Industriale (Sadei) con los datos totales del paru nel día últimu de cada mes dende'l 2021.