Llibru estrella

Un trasgu enraxonáu anda perende

CARBALLEIRA MELENDI, Enrique : ¡Esta ye mio casa! Academia de la Llingua Asturiana, Uviéu, 2000, 34 p.,(Escolín, 54)

Sábese perbién que los trasgos caleyen peles imprentes. Enrieden nelles tola nueche y caemos na cuenta de que tuvieron ellí porque al lleer un llibru atopamos lletres de más o de menos, mayúscules onde teníen de tar minúscules, y hasta llinies y párrafos desordenaos.

Si davezu se comporten asina, aldovina lo que pue facer un trasgu qu’al volver d’unes vacaciones de tres meses en casa d’un primu s’alcuentra con una familia d’humanos viviendo na so casa. Mira a ver qué trastaes se t’ocurríen a ti y compara. De xuro va ganar él, porque a ti nun diba ocurrísete a lo cabero glayar con voz de bisarma ¿O vas dicime que sí?

Home, tamién a él pue caye-y de secute dalguna sorpresa..., pero naide ye más cuciu qu’un trasgu a la hora facer un tratu. Si nun lo crees, ye que nun conoces a esti trastu (quier dicise trasgu) bien simpáticu al que-y punxo historia y figura Enrique Carballeira Melendi y col que ganó’l premiu de Llectures pa Rapazos de L’Academia de la Llingua Asturiana nel añu 2000.

Venga, ánimu: esti trasgu nun muerde. ¡Y que, después de lleelu, te paez curtiu y quedes con ganes de más...! Pues eso tien igua, porque na mesma colección al delláu de neñures ensin cuentu (como nuberos, corcuspinos y más trasgos) vas conocer a otres criatures d’Enrique: el cuélebre y l’home l’espaciu, el príncipe medranosu, el gaiteru de Sotu, que ye como’l flautista d’Hamelín pero al vesre, y hasta un detective galácticu: Xaime Bon (Sí, el so nome ye Bon, Xaime Bon).

Y, yá metíos a esplorar, pues descubrir que na rede hai una páxina d’Enrique Carballeira carballeira@asturiactiva.com. Al traviés d’ella vas dar na Editora del Norte coles aventures de Pillu, un perru que ye mecánicu, y vas saber tamién que n’Ediciones Trabe hai un carbayu cocoteru (Sí, esta vegada lleístilo bien) o unos centollos xigantes que son un casu.

Carballeira tien una facilidá tremenda pa da-yos vida y forma a unos personaxes tan guapos que ye una maravilla lleer los testos y los dibuxos de los sos álbumes, salgan cuélebres, mures o trasgos.

A propósitu: entá nadie descubrió qu’hubiera trasgos na rede, pero habelos, hailos y hasta siento’l de Melendi andar per esta páxina. ¡Alto, que naide se sulfure! Los trasgos nun tienen nada que ver colos virus: son traviesos en forma, pero non dañibles, y hasta dexen pistes pa que les siga la xente que, como tu, ye intelixente y llee llibros interesantes.

Severino Antuña