Entrevista

Ver entrevista anterior

Entrevista fecha a X.Ignacio Fonseca. Maestru de Música en Lieres ( Siero) y miembru correspondiente de l'Academia de la Llingua Asturiana.

Siendo maestru de Música en Porrúa entama'l llabor d'escribir canciones pa nenos sacando al mercáu'l primer discu "Seliquín cancios pa nenos". ¿Cómo surde esta idega?

Col entamu de la enseñanza del Asturianu na Educación Primaria, munchos enseñantes aportamos material pedagóxicu pa facer más fondu'l conocimientu y emplegu de la llingua. Nesti sen, la mio contribución como músicu foi escribir canciones pa los nenos.

Nel añu 1999 ve la lluz el discu "Cantares vieyos... voces nueves" apaeciendo dos años dempués la segunda parte. Los cantares tán recoyíos del Cancioneru de Torner. ¿Ye esta una forma d'averar a los escolinos a la música tradicional?

"Cantares vieyos... voces nueves" ye un camín p'averar a los escolinos a los cantares tradicionales, desconocíos pa munchos d'ellos. A partir de les melodíes orixinales lo que faigo son harmonizaciones más cencielles pa que'l Cancioneru seya más prestosu.

Cómo un maestru de Música pue emplegar les canciones como recursu didáuticu pal deprendiemientu de la nuesa llingua.

Los cantares ponen al escolín en contautu non sólo cola música sinón tamién cola llingua. El mesmu testu ye un elementu motivador pa facer, por exemplu, una llectura entonada, una comprensión de la mesma, resume oral o escritu de la historia, camudar pallabres, trabayar con sinónimos, metáfores,etc.

¿Qué edaes tienen los neños que formen el grupu Xentiquina?

Son neños de 8 a 11 años del colexu públicu de Lieres. Ensayen munchos recreos, tardes de sábadu y domingu pela mañana.

"Nun mos gusten les lenteyes" ye'l caberu discu de Xentiquina. ¿Foi bien acoyíu?

Préstanos abondo cuando vamos a los conciertos y los rapacinos canten con nós, amás sé de pas que nun son asturianistes y merquen el discu pa los sos fíos.

Agora que los nenos nes escueles nun van estudiar Llingua asturiana sinón Llingua tradicional, ¿cómo ves el futuru de la llingua?. ¿Llegarán a deprendela como la llingua de los sos güelos?

Pue llegar a pasar porque hai muncha ceguera por parte de les fuerces polítiques y amás l'asturianu ta perdiendo falantes, hai tán los resultaos de la encuenta de sociollingüíistica del profesor Llera Ramo. Pero al mesmu tiempu tengo muncha esperanza en que nun va tardar en camudar lo que tamos viviendo porque al empar hai una mayor conciencia de que l'asturianu ye la llingua de nós y debe tar presente nes escueles ya institutos.

Pallabres de Xosé Ignacio Fonseca Alonso

Señor Presidente de l' Academia de la Llingua Asturiana, señores académiques y académicos, autoridaes, amigues y amigos:

«Hubo, va yá cuantayá, un país que fue dexando perdese les pallabres. Y asocedió qu'un día, al llevantase, la xente vio ablucao cómo los vieyos árboles diben colando unos n'atristayaes fileres y faciéndose otros cada vez más ruidos fasta quedar a l'altura les formigues. y nun quedaron fayes, nin carbayos, nin figales nin umeros.
Coló una nueche, y Del segundu día tocó-yos a los montes dir menguando, menguando, fasta facese pequeñes muries que saltaben ensin torga los neños más pequeños.
Tocó-y al mar el tercer día y lo que fuere oriella, fola y cantil camudara nun infinitu sableru indefiníu, que por perder perdiere fasta'l Dome. Y yá nun hubo pexes, nin serenes, nin tampoco esplumeros. Al cuartu día tocó-yos a los demás animales, y nun hubo xilgueros nin raitanes, nin naide supo per cuál camín fuxeron los esguilos.
Fue'l quintu día'l de los colores, que murnios poles coses que pasaben, decidieron tornase en gris marengu. De mou que lo que fuere viesca yagua, y color, y bayura de vida y de belleza, fízose pedregal en blancu y negru.
Y asocedió entós qu'un home vieyu y sabiu, d'esos que tolos países tienen ensin tener que de fuera trayelos, entregó-y a una neña una saquina coles vieyes pallabres, colos Domes primeros de les coses, que por sabiu guardare dende tiempu.

Buscó la neña a tolos rapacinos y, nel mayor secretu, sacaron de la saca les pallabres y con elles ficieron cantares que falaben de carbayos, de roles y xilgueros, de montes y de ríos, de raitanes, de fontes, de fayeos...
y nel prietu silenciu de la nueche del sestu día, los neños enllenaron l'aire de pallabres canciando tolos cancios que ficieron primero.
y cuenten qu'a la xente d'aquel sitiu espertólo al otru día'l canciar de los páxaros y, al asomase a les ventanes vieron plasmaos el máxicu desfile de rayes y carbayos que tornaben caún a facer la so viesca. Sintieron el prestosu ruxir maxestuosu de les roles y vivieron sollertes el caberu estirón de les montañes espurriendo les sos cumes al cielu».

Y esti fue'l cuentu que me cuntaron nun sé en cual de de los munchos pueblos que pol mio trabayu de maestru conocí.
Por cierto, podéis creyeme si vos digo que nin en Llieres nin en Sariegu atopé niños, atopé guah.es. En Cabrales nun vi ancianos aconceyaos charrando veriquina'l ríu, vi vieyos. En Cernías, enxamás naide llegó prontito, pero sí llegó ceo. Vi parir delles vaques en Parres y en Porrúa, pueblu entrañable pa mi por tantes coses, y creyéime que pacieron xatinos, non terneros. Señor Presidente de l' Academia, señores académiques y académicos, autoridaes, amigues y amigos:
Un honor mui grande esti que se me fai acoyéndome como académicu correspondiente nesta , institución. No que'a mi correspuende, dende'l mío llugar de maestru y aficionáu a la música, vais atopame, de xuru, faciendo tolo que sepa y pueda por ayudar a caltener nel aire les pallabres con tola dignidá que, precisamente por ser les nuestres pallabres, merecen. Podéis tar seguros que voi poner nello el mayor pricuru y tanta allegría que seguramente lo voi facer canciando. Munches gracies.
Lletres Asturianes.
Academia de la Llingua Asturiana. Uviéu, ochobre,1999, nº 72. PP. 149-150

Mª del Mar Martín
alagueta@telecable.es