Entrevista

Entrevista fecha a Miguel Solís Santos, escritor, pintor, profesor y miembru de l'Academia de la Llingua Asturiana.

Faciendo alcordanza, L'arcu iris y Ñuberu foi'l primer llibru qu'asoleyó l'Academia de la Llingua na so colección Escolín nel añu 1982. Con esta colección, l'Academia quería espardir la llectura en llingua asturiana ente los rapacinos. ¿Cómo foi acoyíu esti llibru ente los maestros d'asturianu nuna época na que se glayaba na cai "Bable nes escueles"?

Entamé a trabayar pa rapacinos porque consideraba que les nueves xeneraciones nun teníen que perder l'interés na nuesa llingua y que meyor llugar que la escuela pa nun escaecer. La literatura ye un camín pa poder averar a los escolinos a una llingua qu'entovía llucha pola so reconocencia a través de la fantasía d'un cuentu.

Dempués d'esti primer llibru apaecerán otros cuentos nos que'l Ñuberu siempre ye'l protagonista. ¿Por qué escoyió esti personaxe mitolóxicu?

Escoyilu porque yera'l mio nomatu cuando entamé a escribir na prensa nel añu 1975

La mayor parte de la xente piensa qu'escribir llibros pa neños ye un llabor fácil, ye quiciabes esta opinión la que dalguna forma provoca l'ausencia d'atención haza esa lliteratura. ¿Qué opinión-y merez esto?

Lo principal a la hora d'escribir un cuentu pa los llectores más pequeñinos ye sacar el nenu qu'ún lleva dientru. Si facemos comparanza por exemplu, ente una novela p'adultos y un cuentu pa nenos, la novela ye más complexa, nun sólo no que cinca a l'argumentación sinón tamién a la caracterización de los personaxes, tratamientu de los diálogos... pero esto nun quier dicir qu'escribir lliteratura infantil seya fácil. Cuando quies tratar un tema tan importante como ye l'ecoloxismu tienes que buscar el camín afayadizu pa que pescancien fechos como'l desaniciu de daqué especies (animales, vexetales) y que meyor que facelo per aciu unos cazadores o d'un ocalitu. Foi asina como nació Los cazadores, los llobos y el Ñuberu y Los árboles, l'ocalitu y el Ñuberu. Otru tema que siempre m'esmoleció ye l'exércitu, siempre tuve a la escontra d'ello paezme de fatos les argumentaciones de los xenerales y la sumisión de los soldaos, asina quixi demostralu nel cuentu El Ñuberu y la paz. Los otros dos llibros que tienen como protagonista al Ñuberu, L'arcu iris y Ñuberu y Les cuatro estaciones y Ñuberu son más bien de calter pedagóxicu. Nel primero'l neñu puede deprender los colores, porque nel arcu iris vive un home que se llama Encarnáu, una señora que respuende al nome de Naranxa... nel segundo cuentu'l neñu pue deprender les estaciones gracies a Primavera, una moza rubia perguapa, a Branu un home que siempre va enriba'l sol, a una neña, Seronda, que-y quita les fueyes a los árboles, y a Iviernu un paisanu yá vieyu tou abrigáu

Como enseñante que ye, ¿cómo averaría a los escolinos a la lliteratura asturiana?

Ún de los llabores más difíciles pal maestru ye poder motivar al escolín pa que s'avere a un mundu bastante lloñe de so. La mio collacia Esther García, tuvo un bon día la feliz idea de camudar los mios cuentos del Ñuberu al teatru, d'esta forma consiguió averar a los escolinos a la lliteratura faciendo que participaren toos, siendo ellos los protagonistes de la historia.Munchos pensarán qu'esto ye una manipulación del testu, al camudar una obra d'un xéneru lliterariu a otru, en parte tienen razón pero camiento qu'esta manipulación algamó un bon final. D'otra miente, na lliteratura asturiana hai un problema bastante importante, ún pue como maestru averar al escolín a la lliteratura, col mesmu esfuerzu qu'un maestru de lliteratura castellana, pero cuando'l neñu llega a los 12 años alcuéntrase na mayor parte de les veces que nun tien profesor, toos sabemos como ta la situación del asturianu na Enseñanza Secundaria, y per otru llau hai mui poca lliteratura xuvenil.

De xuru que munchos llectores quieren saber por qué esi silenciu lliterariu durante tantos años

Esi silenciu ye porque tengo munches aficiones y el día tien venti cuatro hores. Una de les aficiones que provocó esi silenciu foi la pintura, yá fice cuatro esposiciones y agora toi iguando otra n'Avilés.Tamién me dediqué a la ilustración de mapes turísticos pa la conseyería. Ellaboré en 1996 la sección "Asina funciona Asturias" asoleyada pol diariu La Voz de Asturias. Entamé a trabayar nel Istitutu, al empar que trabayaba nun proyeutu d'investigación xenealóxica n'archivos, ganando un accésit del Premiu Fuertes Acevedo col trabayu "La memoria de les dos orielles", fice un estudiu d'Avilés de los sieglos XVII- XIX. Pero la mayor de les mios aficiones foi tar coles mios fíes, agora yá grandines. De toes formes nos mios proyeutos ta tornar a la lliteratura

Nestos momentos cuando ún entra nuna llibrería a mercar un llibru de lliteratura infantil o xuvenil pue dase cuenta que les tornes ocupen un espaciu llargu na estantería. ¿Llegará un día en que falemos más de traductores que d'escritores?

Pue llegar a pasar. Hai que tener en cuenta que les ilustraciones d'un cuentu cuesten munches perres, y munchu trabayu ecribilu y dibuxalu, tienes que tener a daquién que t'asegure que va salir a la cai como asocedió cola Hestoria d'Avilés. Entamé con ella n'avientu de 1983 y finela en xunu de 1984 ente recopilar,lleer, ilustrar... La primera edición sacóla l'Ayuntamientu d'Avilés nel añu 1985 y la segunda la editorial Azucel nel añu 1992 Esto nun ye una disculpa, sinón daqué pa tener en consideranza.

¿Qué-y futuru espera a la lliteratura infantil y xuvenil?

Yo creo que bono porque nestos momentos hai escritores con futuru

Agora que'l Diccionariu yá ta na cai, ¿cree que ye la ferramienta que faltaba p'algamar la oficialidá y llograr asina la reconocencia que merez la llingua asturiana?

Sí, el Diccionariu ye la bendición del cielu. Si faigo una comparanza col de la Real Academia de la Lengua Castellana sal ganando'l nuesu. Como biólogu que soi, siempre lleo les definiciones científiques de plantes y animales y la verdá ye que son meyores

Mª del Mar Martín
alagueta@telecable.es