La zuna de Cherines col asturianu

Los acontecimientos de los díes últimos, cola votación entamada pol PP pa evitar que s’use l’asturianu nuna comisión de la Xunta Xeneral dedicada a estudiar la situación del propiu idioma, algama niveles de surrealismu poques vegaes vistos.

 

“Prohibir usar l’asturianu pa falar del asturianu nel parllamentu asturianu”. Sedría una situación cola que podríemos echar unes rises de nun ser porque la propuesta de los populares consiguió los votos favorables de la FSA-PSOE, Foro y Ciudadanos, esto ye, la mayoría del Parllamentu asturianu, y polo que supón d’ataque a los dechos civiles de los asturianos y sobre manera, al autoestima de los y les asturfalantes.

 

Asturies tien un problema grave, una falta de drechos básicos, una irregularidá democrática que fai qu’una parte de la población nun pueda espresase na so llingua materna en tolos ámbitos y con seguridá xurídica. Esta comisión de la Xunta Xeneral formóse precisamente pa estudiar esta situación. La so primer midida ye prohibir que les convocatories pa esta xunta puedan dir, amás d’en castellán, n’asturianu. Esto ye como si nuna comisión pa estudiar midíes pa llograr la plena igualdá de la muyer, la primer midida fuera prohibir la participación de diputaes d’esti xéneru. Absurdo, antidemocrático (anque se votara, porque vulnera la Declaración Universal de los Drechos Humanos) y tamién inesplicable.

 

La única esplicación qu’atopamos vien de la zuna de Mercedes Fernández 'Cherines' contra la llingua asturiana, que vien de va munchos años y que mos dexó exemplos a esgaya, como na so etapa como delegada del Gobiernu d’España n’Asturies, cuando llevó a los tribunales a los conceyos qu’en 1998 declararon la oficialidá del asturianu nos sos territorios respectivos.

 

Agora nun queda otra que lluchar contra estos ataques, que tienen como víctimes, non a les organizaciones como Iniciativa pol Asturianu (que tenemos que tar agradecíos a Cherines poles sos declaraciones, que movilicen a la xente) sinón polos falantes inconscientes, pola xente de los nuesos pueblos y ciudaes qu’usen l’asturianu ensin tener una conciencia llingüística, y que reciben con estos ataques un golpe duru nel so autoestima. Por ellos y pol futuru del idioma, ye esta llucha cívica.