José Menéndez, danzante de Llarón

Dani García de la Cuesta's picture

El mes pasáu conocí a José Menéndez Suárez, ñacíu en Llarón, Cangas del Narcea, y que fuere ún de los participantes de la danza que se facía na zona nos años sesenta y qu'agora tá en recuperación gracies al trabayu de vecinos, familiares y amigos. José ye primu del afamáu tamboriteiru Francisco de Felipón, de la vecina La Viliella, que morriere en 1990. Ehí van unes semeyes que m'apurrió pa compartiles y onde sal él, José, de Josepillo, colos danzantes.

Dos semeyes son en Degaña, del 6-9-1964. José ye’l segundu pola manzorga de la filera d’abaxo. Llamáronlos porque echaben mui bien la danza y había una visita oficial, d’un tal ¿Ginés?, yeren les fiestes de Fátima. Nuna vese per detrás a Francisco, el tamboriteiru, ye l’únicu con boina. Na otra vese a Jose danzando na filera de la drecha, el segundu per detrás. José comenta que preparaben la danza ya sobre’l día 1 de setiembre, pa facela’l día 8 na fiesta de Santa Eulalla. Que manteníen mui bien les fileres porque seguín mui bien los pasos de la figura del Xuez.

Les semeyes vienen per detrás colos datos del nome del retratista, Saez, y tamién pon Distrito 7.

Les otres dos son de Llarón, del día 8-9-1964. José ye’l terceru pela manzorga, y na otra ye’l que sal de cara colos palos na parte la danza conocía pol Llazu. Tán danzando casi nel mesmu sitiu onde se fizo nos últimos años que tá recuperándose la danza.

La danza empezábenla la víspula, na que llevaben una traxe escuru, y pasaben per toles cases del pueblu, nes que-yos apurríen coses de beber y comer, asina aguantaben tola fiesta. En casa d’él, comíen fréxoles, porque se-y daben mui bien na so güerta. El día siguiente poníen un traxe blancu. Les moces, muyeres y madres son les encargaes de vestilos curiosos, poneyos la cincha, etc.

Contóme que’l frasqueiru qu’acompañaba a la danza, conocíu por Farrucu, llamábase Constantino Álvarez. Cuando danzaba José, Constantino ya yera mayor. El frasqueiru acompañaba a los danzantes tol tiempu y nos descansos facía comedia. Tamién llevaba un palu al que-y ataba’l pelleyu d’un corcuspín pa facer un rasca col que da-yos nes pienres a les moces y la xente. Yera mui comediante, y nos años sesenta, algunes veces, facía dúo con un paisanu de La Cuenca, que trabayaba pa les mines de Llión porque, pola represión, non los dexaben trabayar n’Asturies, y apaecía peles fiestes, por una amistá, a contar hestories y chancies.

Munches gracies José, por tou esto y otres coses más que me contaste, agora yá les sabe más xente.

Nesti enllaz pue sentir la voz de José Menéndez, nun corte nel que ye quien a imitar la fala de los vecinos d'El Corralín, diferente en dalgunes pronunciaciones. Por exemplu, ḷḷumi/llume, paezme oyir que lleva una pronunciación inicial como si fuera casi una d, dumi; ḷḷeite/llechi ye deiḷḷi; ḷḷana/llana, ye dana,; y ḷḷinu/llinu, ye dinu.


Archivu de José Menéndez Suárez. José ye’l segundu pola manzorga de la filera d’abaxo. Danzantes de LLarón, nes fiestes de Degaña, 6-9-1964. El de la boina d'atrás ye'l tamboriteiru Francisco de Felipón.


Archivu de José Menéndez Suárez. José ye’l segundu per detrás. Danzantes de LLarón, nes fiestes de Degaña, 6-9-1964.


Archivu de José Menéndez Suárez. José ye’l terceru pela manzorga. Danzantes de LLarón, nes fiestes de Santa Eulalla, 8-9-1964.


Archivu de José Menéndez Suárez. José ye’l que ta de cara colos palos. Danzantes de LLarón, nes fiestes de Santa Eulalla, 8-9-1964.

Contador Estadistiques