De madreñes (3)

De madreñes (1)

De madreñes (2)

Nestos enllaces de riba comentaba delles coses sobre les madreñes. Sigo con ello col enfotu de conocer d’au son les madreñes que tán nel muséu holandés de Zaanse Schans y que compartí equí.

https://www.facebook.com/photo.php?fbid=411850125670692&set=pcb.41185032...

Ello ye, que depués de la relletura del gran trabayu d’Alfonso Fernández Canteli 'La madreña, tipología y distribución en el noroeste español', de 1987, y basándome nos datos que vienen nél, podemos averamos a conocer la rempuesta.

Como diz Canteli, cuando se punxo a mirar pol prestosísimu mundu la madreña asturiana, topóse cola falta, dafechu, d’información y de referencies bibliográfiques, y les poques qu’había n’otros llugares d’Europa nin siquiera falaben de la madreña; nun se sabía de la so esistencia. Esclariar esti espaciu de desinformación llevólu a crear los sos propios métodos d’investigación, sabedor de que nalgunos casos yá nun diba ser quien a topar datos colos que trabayar, al tar esaniciando la mayoría los madreñeros más vieyos. Asina y too, foi a atropar una riestra de material col que damos una idea del desendolque del usu de les madreñes y d’otros calzaos asemeyaos.

Pa topar en qué llugar hestóricu taben les nuestres madreñes, fizo una comparanza con otros zuecos de maera, y d’ehí sácase que dende l’orixen d’una suela de maera con unes tires p’atar al pie, foi a dase al desendolque de la nuestra madreña, mui evolucionada y adaptada dafechu pal nuesu territoriu gracies a la sabiduría de la cultura tradicional. Asina podemos velo nos sos debuxos. Al empar, de manera mui resumía, podemos ver como s’estremen y la so terminoloxía.

Madreñes n’Asturies y Llión; Almadreñas nel Valle del Pas; Albarcas/abarcas en Cantabria; Galochas na Maragatería, Cabreira, Ancares y fastera galaico-astur.

El pasu caberu, debíu al desdexe del llabor de pastoréu más duru, foi de les madreñes d’escarpín a les de zapatilla, les más abiertes. Los trés tazos son tamién un desendolque asturianu p’adaptase meyor al suelu, facer meyor los xiros y quita-yos pesu a les madreñes.

Como dicía, depués de consultar esti trabayu tan guapu, d’ente tola tipoloxía, a les que más se paecen les del muséu holandés son a les que se fain/facíen pa Tinéu, anque esatamente’l mesmu ornamentu nun tá recoyíu nesti llabor. Habrá más coses sobre madreñes. ¿Préstavos?