Día de la Patria Asturiana

El 8 de setiembre los asturianistes celebramos el Día de la Patria Asturiana, o'l Día de la Nación Asturiana, como vustedes prefieran. El conceutu, como se ve, ye radicalmente distintu al de ‘Día de Asturias’ o ‘Día de la Comunidad’ col que los partíos madrilanos —y los sos retueyos— festexen la fecha. Ente otres coses, ‘Día de Asturias’ pue predicase, y de fechu asina ye, de cualquier festexu folclórico conceyil. Y de la segunda denominación, ‘Día de la Comunidad’, ¿pa qué falar?

 

Y, perriba de too, la coyuntura ye apavoriante, mala n’Asturies, como siempre; pésima nel Estáu. La crisis financiera y económica, pa nós, los asturianos, nun ye más qu’una carga más sobre una economía poco competitiva y arcaica.

 

Per otra parte, los partíos madrilanos, como’l PSOE o’l PP o IX, tán viciados de base pa defender Asturies frente a Madrid. Si en Madrid gobiernen los suyos, a callar como afogaos (¿Daquién recuerda dalguna pallabra del señor Areces contra los incumplimientos escandalosos y les agresiones flagrantes del so partíu a Asturies? ¿Nun se nos cae la cara de vergoña al ver que tola política del PP n’Asturies yera exercer de voz del so amu y allabar la xestión d’Aznar –y nel so día, d’Álvarez-Cascos– como si ellos nun tuviesen aición política dalguna, que así ye?). Cuando, al contrario, estos partíos tienen en Madrid una formación de signu contrariu, la so política va destinada, de manera fundamental, non a representar a los ciudadanos, sinón a actuar de ‘correveidiles’ provinciales de los intereses de so casa matriz. Nuna pallabra, vasallaxe y xestión de la cartera de la so casa central; eso ye lo que los define. Nunca política propia (asturiana), independiente y al serviciu de los ciudadanos (los sos votantes, ente otros).

 

En too casu, nesti Día de la Patria, onde pa nós Cuadonga nun ye namás el solar de la Reconquista española (y tovía, podría decise, de la europea), sinón del nacimientu del Estáu asturianu y de la nacionalidad política asturiana, los asturianistes tornaremos a recordar que somos un pueblu que vien de muncho más atrás de Roma y que la so identidá, mantenida en devenir dinámicu a lo llargo de los sieglos, hemos de tresmitila a les xeneraciones futures. Y esi ye’l trabayu de nueso básicu güei y nel mañana: tresmitir a los asturianos l’arguyu de selo y la esperanza nel futuru; presenta-yos una alternativa a la xestión mala nel presente; ufierta-yos otros modos de gobernase meyores que la desesperanza y la sumisión a Madrid de los partíos centralistes.