“Ye’l momentu d’exercer l’altor de mires y la responsabilidá que nun se tuvieron en 40 años”, apunta la XDLA

|
Manifestación pola Oficialidá 16-O salida segunda pancarta

“Facemos un llamamientu a la responsabilidá al Gobiernu asturianu y al PSOE, y tamién a los demás grupos parllamentarios”, demanda la Xunta pola Defensa de la Llingua Asturiana (XDLA) “énte la situación de bloquéu de la reforma del Estatutu”. “Tovía nun se conoz propuesta nenguna”, llamenta la organización cívica.

“Nun ye’l momentu de dar protagonismu a disputes menores. Ye’l momentu d’exercer l’altor de mires y la responsabilidá que nun se tuvieron nestos 40 años”, espresa esti coleutivu, que recuerda que “namás conocemos condiciones”. “Primero de falar de condiciones tan negatives como la d’imponer una mayoría reforzada de 3/5 pa la futura Llei de Normalización (que daría capacidá de vetu pa cualquier política llingüística a una minoría de 19 diputaos contra una mayoría de 26 y quitaría a cualquier futuru gobiernu la capacidá y la responsabilidá de proponer meyores y adaptaciones a la llei) ye necesario saber qué ye lo que se propón modificar, qué propuesta de redacción presenta'l PSOE pal artículu 4. Fuera d’eso namás hai fumu”, añade.

“Nesta llexislatura l’únicu partíu con capacidá pa entamar esi procesu ye’l PSOE, bien a propuesta del Gobiernu, bien a propuesta d’un númberu superior a 11 representantes na Xunta Xeneral. Namás el PSOE cumple cualquiera d’eses condiciones. Correspuende polo tanto al PSOE la responsabilidá d’entamar la reforma. Quier dicise, la responsabilidá de poner enriba la mesa una propuesta de redacción del artículu 4 y d’entamar la negociación sobre esa propuesta colos demás grupos parllamentarios”, considera la XDLA, que recuerda que “empiecen a acurtiase los plazos d’esta llexislatura”. “Hasta qu’esa propuesta nun tea enriba la mesa, la discusión sobre si hai o nun hai 27 diputaos p’apoyala ye namás una distracción. 27 diputaos p’apoyar ¿qué concretamente?”, entruga.

Dada la situación, “güei queremos treslladar a la sociedá asturiana, a toles organizaciones polítiques, sindicales y sociales, que llamentablemente pue que tengamos que siguir movilizándonos pa llograr los nuestros derechos” magar que’l 16-O “esperábemos que fuera la última movilización pola oficialidá”.

Contador Estadistiques