La XDLA refuga la condición de Foro de los trés quintos p’aprobar la llei que desendolque la oficialidá

|
Manifestación pola Oficialidá 16-O n'El Campo San Francisco

“Equivaldría a conceder capacidá de vetar cualquier desarrollu posterior de la oficialidá a una minoría de 19 votos de los 45”, asegura la Xunta pola Defensa de la Llingua Asturiana (XDLA). Foro punxo como condición pa sofitala incluyir nel Estatutu la necesidá de trés quintos p’aprobar o modificar la llei que la desendolque.

“Dende qu’Adrián Pumares punxera sobre la mesa'l so votu favorable a la oficialidá” con esa llimitación “ta medrando’l ruxerrux de si podría ser aceptable esa comenencia pal movimientu de defensa de la llingua… Nun lo ye”, rescampla la organización ciudadana.

Considéralo “un estorbu inaceptable pal avance en cualquier otru derechu social”, tamién el llingüísticu. “Supondría pasar d’una escepcionalidá, la falta d’oficialidá del asturianu y del gallegu-asturianu, a otra tanto o más llimitante, duradera y peligrosa pa la recuperación de dambes llingues: la imposibilidá d’aprobar lleis de desenvolvimientu de la oficialidá qu’aseguren el futuru de la identidá llingüística d’Asturies”, añade.

Por contra, dende ámbitos cercanos a Foro defenden la midida como una manera de bloquiar la futura llei d’usu y normalización que s’aprobaría na llexislatura próxima énte posibles mayoríes de la derecha contraria a la oficialidá. Nesi sen, la condición presentada por Pumares pa dar el so votu clave pa la reforma estatutaria nun tendría la oposición d'Izquierda Xunida, según apuntó'l so coordinador xeneral Ovidio Zapico, anque sí otres como les fiscales.

“La Xunta pola Defensa de la Llingua Asturiana nun lleva trabayando 38 años pa terminar entregando’l trunfu de la oficialidá a los enemigos acérrimes de la diversidá llingüística. Vamos siguir lluchando por una oficialidá qu’enconte la normalización y denunciando los intentos de balerala de significáu y aplicación, vengan de quien vengan”, posiciónase esti coleutivu.

Contador Estadistiques