Un volume con 24 artículos de Cano como homenaxe a la somedana

|
Claudia Elena Menéndez Fernández actu homenaxe a Ana María Cano

Claudia Elena Menéndez Fernández coordinó, xunto con Pilar Fidalgo, el llibru ‘Llingua, tierra, nomes... Estudios d’Onomástica Románica (1987-2017)’, asoleyáu pola ALLA.

La primera encargóse de presentalu nel actu d'esta mañana a Ana María Cano pola so xubilación nel Aula Magna del Edificiu Históricu de la Universidá d'Uviéu. Na mesma tuvo mui guapes pallabres pa la somedana, profesora y direutora de la so tesis doctoral, recordando lo muncho que-y marcó dende la so primer clase: “Ana ye tolos díes y a toles hores una mayestra nos estremaos sentíos etimolóxicos del términu; ye al empar la persona que sabe enseñar, la que resulta ser una esperta na materia qu’imparte y la que tenemos por modelu o exemplu a siguir”.

Dada l’amplitú del trabayu de Cano, a la hora de la ellaboración del llibru d’homenaxe “cuidemos que lo más afayadizo yera recoyer nun volume como’l que güei ufrimos al públicu una amuesa de delles de les sos aportaciones más valoratibles a la investigación en filoloxía asturiana, en particular, y en filoloxía románica, en xeneral”. Asina decidieron centralo nel campu de la onomástica “por ser ésta una de les estayes con más pesu nel trabayu científicu d’Ana, y ello yelo pola mor del nacimientu allá pela década de los 90 del proyeutu PatRom –Patronímica Románica– puesto en marcha de mano pol romanista alemán Dieter Kremer y empobináu depués y hasta anguaño pola propia Ana, amás de Jean Germain y el mesmu Kreme”.

“El resultáu de la decisiva vinculación d’Ana colos estudios de carácter onomásticu tenémoslu nesta edición”, esplicó Menéndez Fernández. Un total de “24 artículos”, n’orde cronolóxicu, “que foron espublizaos na exa temporal de 30 años en revistes académiques renomaes, obres de conxuntu y actes de congresos internacionales”, carauterizándose “pola amplitú de mires, una presentación de datos fiable y bayurosa, y l’afitamientu d’un métodu innovador que la propia autora contribuyó a desarrollar y perfeccionar”.

Incúi amás trés entamos, firmaos pol presidente de l'Academia de la Llingua Asturiana (ALLA), Xosé Antón González Riaño, pola primer persona al frente de la institución, Xosé Lluis García Arias, y poles dos coordinadores, y una reseña bibliográfica de Cano. “Aguardamos que facilite l’alcance pal públicu especializáu d’un conxuntu testual indispensable, y al mesmu tiempu, avere a los non especialistes l’interés por comprender una parte importante de la identidá personal, les interrellaciones sociales y l’asitiamientu humanu nel mundu que nos arrodia”.

Na semeya, Menéndez Fernández nun momentu de la so intervención, con Humberto Rodríguez Solla, vicerrector de Rellaciones Institucionales y Coordinación de la Universidá d'Uviéu; Cano; González Riaño; y Antón García, direutor xeneral de Política Llingüísta, sentaos.

Contador Estadistiques