L’ALLA homenaxa a Cano con un actu na universidá y l'asoleyamientu de los sos estudios d’onomástica románica

L’Aula Magna del Edificiu Históricu de la Universidá d’Uviéu va acoyer esti vienres un actu d’homenaxe a Ana María Cano por parte de l’Academia de la Llingua Asturiana (ALLA). Con motivu d’esta reconocencia espublízase’l llibru ‘Llingua, tierra, nomes... Estudios d’Onomástica Románica (1987-2017)’ qu’axunta la xera investigadora nesti terrén de la ex presidenta de la institución y caderalga emérita.

L’ALLA anuncia un actu “cenciellu” que nun va tar faltu d’emoción. Va tener llugar al meudía, con un aforu llendáu a persones convidaes que confirmaran asistencia, pero la Universidá d’Uviéu va emitilu en direuto pela so canal de YouTube.

Con motivu d’esti homenaxe asoléyase llibru ‘Llingua, tierra, nomes... Estudios d’Onomástica Románica (1987-2017)’, un campu na que Cano tien collechao bona parte de la so producción. Ésti recueye la xera investigadora de la filóloga nesti campu qu’estudia los nomes propios.

Presidenta de l’ALLA dende’l 2001 al 2017 y ayalguera previamente, la somedana caltién responsabilidaes importantes na vida académica. Asina lleva la direición de les Xornaes Internacionales d’Estudiu y de la revista ‘Lletres Asturianes’, dos de les actividaes de mayor percorríu, dambes empobinaes a la cientificación y la internacionalización de l’asturianística, y representa a la institución nel Real Instituto de Estudios Asturianos (RIDEA) y na Xunta Asesora de Toponimia del Gobiernu.

Tamién s’encarga de la supervisión de la obra investigadora que bien de científiques y científicos desendolquen y asoleyen na ALLA y, per munchos años, foi responsable del programa formativu de la mesma. Amás, miembru de númberu dende la creación de la institución, formó parte de les comisiones redautores de les ‘Normes ortográfiques’, de la ‘Gramática’ o del ‘Diccionariu’.

“El so trabayu rigorosu, la so implicación personal y capacidá d’interllocución y el so espíritu d’equipu siempre tuvieron y tán al serviciu de la proyeición internacional, el prestixu y el dinamismu d’una llingua recuperada, en bona midida, gracies al facer de la profesora, científica y académica somedana”, rescamplen dende l’ALLA.