Selmana de les Lletres Asturianes

Salú Pública ve un "horizonte favoratible" daos los datos últimos de la pandemia de COVID-19

|
Rafael Cofiño

"Ye importante nun relaxar les midíes", recuerda'l direutor xeneral Rafael Cofiño. El miércoles detectáronse 101 casos nuevos y sumóse la segunda xornada ensin finaos.

El descensu lentu que se ta viendo na incidencia global y, más marcáu, en mayores de 65 años, y l'avance na vacunación permite a les autoridaes ser más optimistes qu'en selmanes pasaes. "Ye un horizonte favoratible", repitió delles vegaes esta mañana Cofiño, que tuvo acompañáu de María José Villanueva, coordinadora de Programes COVID, pa esplicar la situación epidemiolóxica actual y el funcionamientu del sistema de vixilancia de contautos estrechos, de manera respeutiva.

El martes la incidencia a 14 díes yera de 153 casos cada 100.000 habitantes, la cifra más baxa dende'l 7 de xineru, cuando foi de 152, nel entamu de la tercer fola. Dende'l 15 de marzu esti indicador venía baillando ente los 158 y los 175 casos.

En mayores de 65 años ye de 94, en nivel de riesgu mediu dende'l vienres. Magar esti ameyoramientu, "ye importante nun relaxar les midíes", alvirtió Cofiño.

Tasa de positividá diaria del 5,11 por cientu

A falta de la espublización de los datos oficiales de la COVID-19, la Conseyería de Salú informó de 101 casos nuevos ayeri –l'actualización suma 1 más non contabilizáu en díes anteriores–. Son 2 más que'l martes, cuando se detectaron 99.

El Serviciu de Salú del Principáu d'Asturies (SESPA) fixo 2.876 pruebes de diagnósticu d'infeición activa feches, pola que la tasa de positividá s'asitió nel 5,11 por cientu, superior a la del día anterior, cuando foi del 3,93 por cientu. A 7 díes esti porcentaxe taba enantes de l'actualización nel 5,22 por cientu –ayeri baxó mínimamente, d'un 5,225 a un 5,221 por cientu–.

Per segunda xornada nun hai que llamentar muertes, polo que la cifra total de finaos nel andanciu sigue en 1.945. El númberu de hospitalizaos con confirmación o sospecha de COVID-19 xubió a 161, 4 más que'l miércoles, a los qu'hai que sumar los 59 que tán na UCI, 1 menos.

41 biltos activos

Asturies informó al Ministeriu de Sanidá de la esistencia de 41 biltos activos, mesma cantidá qu'hai una selmana, con un total de 416 casos. 15 d'ellos detectáronse estos 7 díes últimos, comunica la conseyería.

 

Contador Estadistiques