Rubiera presentó con música a familiares y amigos la sala de la Fundación Almastur

El cantante presentó nun actu íntimu la instalación y los proyeutos de la organización, y sentóse al pianu pa interpretar dellos cantares.

Una trentena de persones pudo conocer de primer mano'l trabayu desendolcáu por Carlos Rubiera y la so familia nel desván de la so casa en Caldones p'acondicionar l'espaciu y convertilu na sala de la Fundación Almastur con una cesión, renovable, per 10 años. Meses de trabayu que permiten contar con un espaciu de 70 metros cuadraos útiles, amás d'unos almacenes llaterales, con aforu pa 40 persones nel qu'entamar actos músicales-lliterarios de pequeñu formatu, presentaciones, charres o alderiques.

Rubiera presentó a los convidaos, familiares y amigos del ámbitu musical y del asturianismu cultural, toles instalaciones que la familia cede a la Fundación Almastur, asina como los proyeutos previstos, como'l taller de madera tradicional, que pretende entamar pa payares sol horru de la vivienda, y yá l'añu qu'entra, en planificación, un ciclu dedicáu a l'asturianada en collaboración con Eduardo García Salueña, otru lliterariu-musical, unes xornaes pa profesionales de l’arquiteutura del ámbitu de la restauración de cases o construcciones na zona rural asturiana baxo la direición de Xuan Pedrayes y la participación d’Ástur Paredes, y actividaes pa conmemorar los 50 años de Conceyu Bable. Ente los presentes, el direutor xeneral d'Aición Cultural y Normalización Llingüística, Antón García; Ramón d'Andrés; o Iván Llera, presidente d'Iniciativa pol Asturianu, coleutivu col que la fundación firmó'l so primer conveniu y organiza conxuntamente la Xira pola Oficialidá. 

L'actu siguió con un conciertu al pianu de Rubiera, presidente d'un Patronatu conformáu pola so madre y los sos dos fíos, qu'arrancó cola so versión al asturianu del 'Viatge a Ítaca' del catalán Lluís Llach y siguió con cantares colos que foi recordando a persones importantes de la so carrera como Xulio Ramos, Berto Turulla, Manolo Quirós, Pedro Bastarrica o René de Coupaud. Convidó a cantar a Mariluz Cristóbal, interpretó un tema xunto cola acordianista María Álvarez Santiago y dexó'l pianu a Óscar Camacho.

La xornada completóse con una espicha nel llagar, d'usu compartíu de la familia Rubiera y la Fundación Almastur, que naz pal “estudiu, la defensa, la divulgación de la cultura asturiana en tolos sos ámbitos y manifestaciones, tanto tradicionales como en nueva creación”. El gran oxetivu, la creación Escuela de la Cultura Asturiana que se vaya configurando coles diferentes actividaes que s'entamen dende la organización.

Na semeya, un momentu de la interpretación de Cristóbal, con Rubiera al pianu.