Rodrigo Cuevas lleva la memoria de Rambal per toa Asturies col circuitu 'Autores nel Camín'

De llunes a domingu va protagonizar coloquios en dellos conceyos sobre la figura del xixonés.

'Rambalín' foi la canción merecedora del XII Premiu Camaretá al Meyor Cantar na gala celebrada en payares del 2020 en Navia, habanera dedicada a Alberto Alonso Blanco ‘Rambal’, persona bien conocida nel Xixón de los años 60 y 70 y homosexual reconocíu naquellos tiempos d'ausencia de llibertaes que foi asesináu nun crime ensin resolver. El so intérprete, como homenaxe, foi Rodrigo Cuevas, que s'incorpora a Autores nel Camín pa dar a conocer la memoria d'esti vecín de Cimavilla.

El formatu d'esta actividá va ser el de coloquiu, pa finar cola interpretación de la pieza en direuto. La primer cita ta programada pa esta tarde, a les 19 hores, na Factoría Cultura d'Avilés, pa siguir el restu de la selmana, una por día: mañana, en Grau (19.30 hores, Casa la Cultura); el miércoles, en Les Vegues (19 hores, El Llar); el xueves, en Villaviciosa (19 hores, Teatru Riera); el vienres, en Candás (20 hores, Teatru Prendes); el sábadu, en Cangas del Narcea (20 hores, Teatru Toreno); y el domingu en Bimenes (18.30 hores, Casa Cultura).

Na semeya, Cuevas entrega'l troféu del Camaretá a Carla Armas, ganadora de la edición d'esti añu del gallardón.