Miles de persones reclamen en Xixón la convocatoria d'una fuelga xeneral

Alredor de 3.000 persones participaron na marcha convocada en Xixón por CSI, CGT, CNT y SUATEA “contra los recortes y pola fuelga xeneral”. La protesta trescurrió con normalidá pese a les torgues de la Delegación del Gobiernu estatal nel país.

La salida de la manifestación tuvo llugar poco más tarde de les 19.30 hores de la plaza de L’Humedal. Pancartes y banderes de los sindicatos convocantes y d’otres organizaciones –ente les que taba Compromisu por Asturies con un baberu que rezaba ‘Asturies polos derechos llaborales y sociales’– y coleutivos de trabayadores, daben color a la marcha, que xiró per Álvarez Garaya en direición a los Xardinos d’El Náutico. Nesa cai, frente a la sede del PP xixonés, los manifestantes quemaron un muñecu que representaba a Mariano Rajoy aforcáu éntre la mirada atenta de dellos axentes de la Policía, qu’esperaron a que dexara d’arder pa retiralu de la calzada. L’otru momentu reivindicativu na ruta de la marcha foi na cai San Bernardo, na Librería Central, comerciu que pese a facturar 850.000 euros nel 2011, según aseguren dende la Corriente Sindical d’Izquierda (CSI), ta acabante de despidir a una trabayadora tres siete años na empresa por negase a aceptar un ERE. Dellos manifestantes punxeron pegatines na cristalera informando d’esta maniobra de los propietarios de la llibrería.   

La marcha llegó a El Naútico ensin nengún incidente que reseñar y los cabezaleros de los sindicatos tomaron la pallabra pa criticar la situación política actual, refugar la política de recortes y llamar a la fuelga xeneral. Nel actu tamién hubo tiempu pa informar a los presentes de dalgunos de los munchos conflictos llaborales que ta viviendo anguaño’l país, como’l d’APTA o’l de Cocinas Asturias, empresa que ta acabante de dexar na cai a 26 persones.

Error del Conceyu de Xixón

Esta protesta convocada polos sindicatos minoritarios tuvo l’amenaza de la prohibición por parte de la Delegación del Gobiernu estatal n’Asturies. La Policía cito na mañana d’ayeri a responsables de la CSI pa comunica-yos qu’esti órganu nun diba permitir la celebración de la marcha, a los que los sindicalistes retrucaron presentando tola documentación en regla. Al final, a media tarde, el comisariu de Xixón llamó al sindicatu pa comunicar que la confusión supuesta vieno por un error del Conceyu de Xixón al nun treslladar ésti la comunicación a la Delegación.