“La meyor herencia que dexó Conceyu Bable foi l’arguyu d’identidá”, asegura Barbón

El presidente Adrián Barbón recibió en Presidencia a Xuan Xosé Sánchez Vicente, Xosé Lluis García Arias y Lluis Xabel Álvarez, los trés fundadores de Conceyu Bable. La XLV Selmana de les Lletres Asturianes ta dedicada a esti coleutivu clave pa entender el país.

L’alcuentru tuvo llugar esta mañana y contó cola presencia tamién de la conseyera de Cultura, Política Llingüística y Deporte, Ana Vanessa Gutiérrez. Barbón atendió a los medios enantes de pasar a la zona onde ta espuestu’l despachu de Belarmino Tomás, onde pudo intercambiar esperiencies colos trés convidaos.

“Un llugar mui simbólicu porque ye nel que se debatíen y nel que se tomaron alcuerdos perimportantes pa la historia d’Asturies qu’hai que reivindicar ensin mieu”, espresó n’asturianu’l socialista. “Ye un placer pa la conseyera y pa min recibilos equí y reivindicar una vez más que frente al pesimismu, ilusión siempre; y frente a esa crisis d’identidá, arguyu, arguyu de pertenencia, arguyu d’identidá asturiana y asturianía”.

“Pa min ye un arguyu recibir nesti Palaciu de la Presidencia del Principáu d’Asturies a los fundadores de Conceyu Bable va facer 50 años”, arrancó la so intervención Barbón, que rescampló’l mensaxe d’un coleutivu “que reivindicó la propia identidá”. “La mayor reflexón y la meyor herencia que dexó Conceyu Bable pa les xeneraciones siguientes foi la conciencia d’Asturies y l’arguyu d’identidá”, afirmó.

El llunes va arrancar la XLV Selmana de les Lletres Asturianes, que ta dedicada nesta ocasión a Conceyu Bable nel cincuentenu aniversariu de la so fundación. Un llibru, un documental, delles esposiciones y un alderique con miembros del coleutivu son parte de les actividaes previstes.

Na semeya, Gutiérrez, Sánchez Vicente, Barbón, Álvarez y García Arias, charren nel espaciu onde ta asitáu'l despachu de Belarmino Tomás.