“Más de venti nacionalidaes conocieron en Sudáfrica la situación del asturianu y el nuesu proyeutu”, rellata Suárez

|
“Más de venti nacionalidaes conocieron en Sudáfrica la situación del asturianu y el nuesu proyeutu”, rellata Suárez

La Wikipedia n’asturianu tuvo presente na convención añal de la Wikimedia Foundation que se celebró en Cape Town. Víctor Suárez acudió tres recibir una beca a Sudáfrica, onde pudo dar a conocer la situación del asturianu y el proyeutu a persones de “más de venti nacionalidaes” y afondar la collaboración con Wikipedia Colombia.

“En comparanza col añu pasáu en Montreal, nesta ocasión pudi visibilizar más el tema del asturianu”, esplica l’usuariu y alministrador de Wikipedia n’asturianu. En total, contabiliza que compañeros “de más de venti nacionalidaes diferentes conocieron la situación del asturianu y el nuesu proyeutu” en Wikimania 2018, destacando nesi sen la posibilidá de contautar con muncha xente africano.

“Falé con xente de Wikimedia Sudáfrica, Costa de Marfil, Zimbabue o Congo”, esplica Suárez, que rellata cómo un costamarfileñu “soprendíase de lo qu’asocedía col asturianu cuando nel so país conviven 60 llingües”. Precisamente la diversidá yera la temática principal de la convención d’esti añu celebrada ente’l 18 y el 22 de xunetu, polo que se decidió que fora Sudáfrica la sede.

La presencia en Wikimania 2018 tamién sirvió a Suárez, llegáu recién a Asturies, p’afondar na rellaición colos compañeros llatinoamericanos, sobre manera con Colombia, poniendo les bases al proyeutu que van poner en marcha en comuña d’artículos venceyaos cola emigración. La única parte negativa foi la paralización del grupu de trabayu sobre llingües minorizaes nel mundu que Wikipedia n’eusquera entamó l’añu pasáu en Montreal y na que l’asturiana pretendía siguir collaborando.

Sicasí, la importancia de los idiomes minoritarios en Wikipedia foi ún de los puntos que Jimmy Wales, fundador de la enciclopedia llibre, trató na conferencia final de la convención. Nella citó al galés por llegar a los 100.000 artículos, 15.000 menos que l’asturiana (85.164 nestos momentos), “y cifra que pretendemos algamar a finales del añu, col oxetivu de tener 150.000 nel 2019, polo que vamos contautar con Wales pa ver si nos pue citar l’añu que vien”, lo que serviría pa dar una gran visibilización a la llingua asturiana pola cantidá de xente presente nestes convenciones –más de 1.000 persones llocales aparte de los 200 que vienen de tol mundu– y la so repercusión en medios internacionales.

Precisamente Suárez aprovechó la so estancia en Cape Town pa xubir l’artículu 80.000 de la Wikipedia n’asturianu, que dedicó a la científica sudafricana Patience Mthunzi-Kufa, conocida poles so investigación pa la cura del sida. Esta escoyeta nun foi casual, yá que la intención yera dedicar el mesmu a una muyer sudafricana como símbolu de la presencia de la comunidá asturiana na convención celebrada nesi país y, al empar, siguir trabayando en frayar la fienda de xéneru esistente na enciclopedia llibre.

Proyeutu de grabación de toles llingües del mundu

Ente los munchos contautos fechos mientres la convención, Suárez tamién destaca’l proyeutu al que se va sumar de grabación de toles llingües del mundu entamáu por un usuariu de New York “que venía de Namibia de rexistrar llingües llocales, asina como otres sudafricanes como’l zulú”. D’igual forma cita la so participación nun grupu de trabayu de muyeres africanes pa buscar la so visibilización, a la que Wikipedia n’asturianu va sumase tamién “faciendo dalgo sobre afrodescendientes n’Asturies”.

Otra manera, “consiguimos iguar dellos problemes téunicos que teníemos na Wikipedia n’asturianu nun espaciu que se llamaba Hackaton onde había xente especialista” y fíxose la torna “d’unes 2.000 llinies de términos que va permitir traducir en Wikidata decenes de miles de descripciones d’elementos, tengan o non artículu”.

Na semeya, Víctor Suárez coles compañeres y compañeros del grupu de trabayu sobre la visibilización de muyeres afroamericanes.

Contador Estadistiques