L'Uviéu fraya rellaciones col Sporting tres el derbi

Pol tratu que vivieron los sos aficionaos n'El Molinón. El conxuntu roxiblancu respuende amosando los estrozos na zona visitante.

El derbi nun finó col xiblíu de Isidro Díaz de Mera Escuderos. L'Uviéu esperó a esta madrugada, xornada na que'l club celebra'l so noventenu tercer aniversariu, pa emitir un comunicáu nel que carga contra LaLiga y el Sporting, club col ruempe: "Les rellaciones institucionales col Real Sporting de Gijón, qu'hasta esti momentu foron correutes, van interrumpise d'agora a alantre hasta certificar que los nuesos aficionaos, como parte de la institución que son, reciban un tratu respetuosu, xustu y acorde col que merecen, y col que los sos siguidores recibieron nel Carlos Tartiere".

Los argumentos del club azul pa tomar esta decisión son la falta de baños, d'agua nes cantines y los cacheos de seguridá, incidiendo en que delles persones tuvieron que retirar camisetes al nun ser éstes permitíes por LaLiga cuando, supuestamente, nel casu de l'afición llocal nun se vivieron esos controles. Tamién fai referencia a un incidente que se vivió nel aparcamientu cola seguridá privada del Sporting colos acompañantes del conseyu d'alministración del Uviéu y trabayadores del club azul.

Otra manera, nel estensu comunicáu faise mención tamién a otres situaciones "que consideramos arbitraries, inxustes y que se produxeron de forma reiterada cola nuesa afición y la nuesa entidá", como la negación de la venta d'entraes n'Almendralejo a un grupu d'aficionaos o "un tratu poco equitativu" dende LaLiga en comparanza con otros clubes. Por ello, el conseyu d'alministración al completu nun va sentanse nel palcu en mou de protesta hasta'l minutu 12 del partíu que'l domingu enfrenta al Uviéu col Deportivo (18 hores, Movistar Partidazo).

Sorpresa en Xixón

La respuesta del Sporting a les acusaciones del Uviéu nun tardaron en llegar y esta mesma mañana abrió les puertes d'El Molinón pa defendese y amosar l'estáu en que quedó la zona na que s'asitiaron los siguidores azules. "Non sólo apreciarán les cabines estrozaes y puertes rotes, sinón tamién les más de 100 butaques arrancaes o inutilizaes", anunció'l club nun comunicáu asoleyáu a les 12.54 hores.

"El Real Sporting, como club organizador del alcuentru disputáu'l domingu pasáu ente la nuesa primer plantiya y la del Real Oviedo, llendóse a cumplir fielmente coles normes qu'al efeutu afita la Liga Nacional de Futbol Profesional y la Llei contra la Violencia, el Racismu, la Xenofobia y la Intolerancia nel Deporte", comenzaba la nota, na que rellata que "el Real Oviedo desplazó 4 persones de seguridá más el so coordinador y, nin enantes, nin mientres, nin después del partíu fixéronnos observación dalguna sobre cualquier tipu d'anomalía o quexa, nin dende la zona de los aficionaos visitantes, nin dende la UCO, onde taba ubicáu'l coordinador de seguridá del Real Oviedo". Tres defendese de toles acusaciones azules, el Sporting asegura que "llamenta fondamente la decisión unillateral del Real Oviedo de frayar rellaciones institucionales, qu'hasta la fecha y al menos nestos dos años nos que compartimos categoría deportiva non sólo foron correutes, sinón mui cordiales, d'ehí la sorpresa por nun tener noticia dalguna nin quexa al respeuto hasta la emisión d'esti comunicáu, impropiu d'un club de la categoría del Real Oviedo. Nun se pue acusar primero y entrugar depués".

El club xixonés, que solicita al Uviéu una rectificación "pol bien del fútbol, de los sos aficionaos y de toda Asturies", tamién espardió un videu nel qu'amuesa la situación na que quedó la zona visitante.