El Sporting sal reforciáu del derbi asturianu

Un gol en propia de Christian Fernández na primer metá sentenció un emocionante derbi a favor del Sporting, conxuntu que sal reforciáu del choque de rivalidá al acumular cuatro trunfos siguíos. El partíu nun tuvo exentu de polémica pola decisión del árbitru, mui protestáu pol Uviéu, d’anular un gol a Ibra nel 89.

La xugada clave del partíu vieno d’una falta sacada en campu propiu pol Uviéu, que toca de cabeza Carlos Hernández hacia l’área, onde’l xugador senegalés trata d’enganchar el balón de primeres cruciándose Peybernes. El delanteru golpia al central francés, que va al suelu, quedando’l balón francu pa un segundu intentu de remate qu’acaba en gol.

El colexáu Isidro Díaz de Mera Escuderos, bien posicionáu, interpretó falta d’Ibra na xugada, polo que procedió a anular el gol, énte les protestes de xugadores y bancu visitante. Darréu prolongó 5 minutos el partíu, que morrió ensin más peligru pa la meta de Mariño.

Salió’l Sporting nesta ocasión cola intensidá que nun tuvo na ida nel Tartiere, cediendo la pelota al Uviéu y disputando tolos balones dividíos. Saúl Berjón, el meyor argumentu de los azules, tuvo bien vixiláu polos roxiblancos, con Geraldes enriba del uvieín cada vegada que recibía na so banda, munches vegaes rozando la cartulina mariella.

Sicasí, el peligru siempre vieno de les files roxiblanques. Asina llegó’l gol nel minutu 31, cuando Carlos Hernández alloñó la pelota nun ataque llocal, adelantándose Molinero a Bárcenas y recoyéndola Nacho Méndez, que filtró un pase a Djurdjevic pa ganar el serbiu la llinia de fondu y buscar a Álex Alegría en boca de gol, tocando l’asistencia Christian Fernández cola mala suerte d’introducir el balón na so propia portería.

Penalti falláu

El gol dio confianza al Sporting y obligó al Uviéu a dar un pasu alantre, anque ensin ocasiones de peligru. La situación llevó a Anquela a mover el bancu pronto, nel 62, introduciendo a Diegui y a Ibra por Bárcenas y un desafortunáu Joselu, de manera respeutiva, cola intención de ganar más profundidá y opciones de remate.

Djurdjevic, que lluchó por tolos balones calteniendo una batalla constante con Carlos Hernández, tendría la oportunidá de sentenciar el partíu dende los once metros. Sicasí, el serbiu fallaría la pena máxima señalada por un manotazu de Christian Fernández a Alegría al adivinar Champagne la so intención.

Esta aición, xunida a la entrada de Toché, tornó’l partíu del llau azul. El Sporting comenzó a pensar en defendese, aprovechando bien los d’Anquela los centímetros de los dos delanteros.

Asina, llegaría la ocasión más clara pa los visitantes, un minutu enantes de la xugada polémica del partíu. Ibra cedía de cabeza a Toché, que solu nel área pequeña remataba tamién de cabeza, ensin pode-y dar la fuercia necesaria pa poner n’aprietos a Mariño.

Dos puntos de ventaya

A pesar del trunfu, el Sporting sigue na tabla perbaxo l’Uviéu, que suma 47 puntos, dos más que los xixoneses. L’empate del Cádiz en casa col colista, el Córdoba (1-1), fai que los azules sigan teniendo a tiru la sesta plaza, qu’ocupen los gaditanos con 49 a falta de que’l Mallorca (48 puntos) xuegue esta nueche en Son Moix col Zaragoza (21 hores, GOL).